दिल्लीच्या एका रीलस्टारची वर्षभरापूर्वी सोलापुरातील अल्पवयीन मुलीशी इन्स्टाग्रामच्या माध्यमातून ओळख झाली. त्याने आधी मुलीला प्रेमाच्या जाळ्यात ओढलं. मग फूस लावून तो तिला पळवून नेण्याच्या तयारीत होता. मात्र सोलापूरमधील काही सामाजिक कार्यकर्त्यांनी हे प्रकरण उघडकीस आणलं.
विशेष म्हणजे दिल्लीचा हा रिल्सस्टार सहा महिन्यांपूर्वी सोलापूर शहरात येऊन त्या अल्पवयीन मुलीला भेटला होता. 9 जूनला तिला न्यायला तो सोलापुरात आला होता. अजनान ऊर्फ समीर मोहम्मद नसिम (वय 19, रा. दिल्ली) असे त्या संशयिताचे नाव आहे. सोलापूर पोलिसांनी त्याला ताब्यात घेतले असून त्याच्यावर गुन्हा दाखल करण्यात आला आहे.सामाजिक कार्यकर्त्यांची सजगता
सोलापूर शहरातील श्री सिद्धेश्वर मंदिर परिसरात दिल्लीतील रिल्स स्टार आणि सोलापूरमधील अल्पवयीन मुलगी फिरत होते. त्यांच्या हालचालीवरून काही सामाजिक कार्यकर्त्यांना प्रकरण संशयास्पद वाटले. त्या दोघांकडे सामाजिक कार्यकर्त्यांनी विचारपूस केली त्यावेळी हा प्रकार समोर आला.
कार्यकर्त्यांनी ताबडतोब पोलिसांशी संपर्क साधला. दिल्लीतील त्या तरुणाविरुद्ध फौजदार चावडी पोलिसांत ‘पोक्सो’सह अन्य कलमांतर्गत गुन्हा दाखल झाला आहे. अजनान ऊर्फ समीर मोहम्मद नसिम याला अटक करून कोर्टात हजर केले असता न्यायालयाने दोन दिवसांची पोलीस कोठडी सुनावली आहे.
इन्स्टाग्रामवर ओळख
संबंधित अल्पवयीन मुलगीही इन्स्टाग्रामवर रील बनवत असून ती सोलापूर शहरातील एका महाविद्यालयात शिक्षण घेत आहे. अजनान उर्फ समीर हादेखील रिल्स स्टार आहे. त्या दोघांची वर्षापूर्वी इन्स्टाग्रामवरच ओळख झाली होती. दोघांनी एकमेकांना मोबाईल क्रमांक दिले आणि त्यांचे फोनवर बोलणे सुरू झाले.
विवाहासाठी आग्रही
दिल्लीमधील समीर त्या अल्पवयीन मुलीला अनेक महिन्यापासून विवाहासाठी आग्रह करीत होता. विवाहानंतर हिंदू धर्म स्वीकारतो, असेही तो तिला म्हणाला होता. पण, ती मुलगी विवाहासाठी तयार नव्हती. त्यामुळे तिला समजावून सांगून सोलापुरातून दिल्लीला न्यायचे म्हणून समीर रेल्वेने 9 जून रोजी सोलापूर शहरात आला होता.
फौजदार चावडी पोलिस ठाण्याच्या हद्दीतील एका लॉजमध्ये तो थांबला. दररोज ते दोघेही दररोज बाहेर फिरायला जात होते. सामाजिक कार्यकर्त्यांनी 11 जून रोजी त्या दोघांना पोलिसांच्या स्वाधीन केले. पोलिसांनी तपास करून त्या तरुणाविरुद्ध गुन्हा दाखल केला आहे.