पिंपरी चिंचवड भागातील प्रेमलोक पार्क परिसरात शुक्रवारी रात्री एक विचित्र दृश्य पाहायला मिळालं होतं. एका झाडाच्या ढोलीतून अचानक पाणी वाहू लागलं. त्यामुळे पाहता पाहता ते झाड ‘दैवी चमत्काराचं’ केंद्र बनलं. कोणी म्हणालं, “झाड अश्रू ढाळत आहे”, तर कोणी याला चक्क “अमृतधारा” असं संबोधलं. श्रद्धा-अंधश्रद्धेची घुसळण सुरु असतानाच हा नेमका काय प्रकार आहे, हे स्पष्ट झालं आणि सर्वांनी सुटकेचा निश्वास टाकला.
चिंचवडमधील प्रेमलोक पार्क परिसरात असलेल्या या झाडाच्या भोवती क्षणातच गर्दी जमा झाली. कुणी त्याला हार घातले, तर कुणी हळद-कुंकू वाहू लागलं. कोणी म्हणालं, हे पाणी अंगाला लावल्यामुळे शांतता मिळते. सोशल मीडियावरही या झाडाचे फोटो आणि व्हिडीओ अल्पावधीत व्हायरल झाले.
परिसरातील काही सूज्ञ आणि विज्ञानवादी नागरिकांनी हा चमत्कार नसल्याचं समजून घेत शंका उपस्थित केली. याची माहिती तात्काळ अग्निशमन दलाला देण्यात आली. त्यानंतर पिंपरी चिंचवड महापालिका पाणी पुरवठा विभागाने तपासणी केली असता, यामागचं वास्तव उघड झालं.
या ठिकाणी काही वर्षांपूर्वी टाकलेली भूमिगत पाईपलाईन फुटली होती. त्याच ठिकाणी उगवलेल्या झाडाच्या खोडातून पाण्याला वाट मोकळी मिळाल्याने झाडातून पाणी वाहू लागलं होतं.
“श्रद्धा ठेवायला हरकत नाही, पण झाडातून पाणी वाहायला लागलं, तर आधी नळ तपासा, देव सापडेल अथवा नाही, पण गळती नक्की सापडेल” अशा शब्दात एका वृद्धाने या साऱ्या प्रकारावर टिपणी केली होती.
राम मंदिरात 45 किलो सोन्याचा वापर
अयोध्येतील राम मंदिराच्या उभारणीसाठी एकूण 45 किलो शुद्ध सोन्याचा वापर करण्यात आल्याची माहिती राम मंदिर बांधकाम समितीचे अध्यक्ष नृपेंद्र मिश्रा यांनी दिली.
मंदिर संकुलाच्या पहिल्या मजल्यावर राम पंचायतनच्या प्राणप्रतिष्ठापना सोहळ्यानंतर दुसऱ्या दिवशी शुक्रवारी मिश्रा यांनी ही माहिती दिली. मंदिरासाठी वापरण्यात आलेल्या सोन्याची किंमत करवगळता 50 कोटी रुपये आहे. यापैकी बहुतांश सोने तळमजल्यावरील मंदिराच्या दरवाजांना आणि प्रभू रामाच्या मूर्तीच्या मुकुटासाठी वापरण्यात आले आहे. शेषावतार मंदिरात अद्याप सोन्याचे काम सुरू आहे.
राम मंदिराची मुख्य रचना पूर्ण झाली असली, तरी संग्रहालय, सभागृह आणि गेस्ट हाउस यासह मंदिर परिसराच्या इतर भागांचे बांधकाम अद्याप सुरू आहे. डिसेंबर 2025 पर्यंत हे काम पूर्ण होणे अपेक्षित आहे.