‘प्लास्टर ऑफ पॅरिस’च्या (पीओपी) मूर्तींवरील बंदीच्या उच्च न्यायालयाच्या अंतरिम आदेशामुळे महापालिका प्रशासनाकडून माघी गणेशोत्सात उपनगरांतील ‘पीओपी’ गणेशमूर्तींचे नैसर्गिक जलाशयात विसर्जन करण्यास मज्जाव करण्यात आला. यामुळे मूर्तिकार संतप्त झाले असून, पर्याय उपलब्ध करून देण्याची मागणी त्यांनी राज्य सरकारकडे केली आहे. तोपर्यंत ‘पीओपी’च्याच मूर्ती बनवण्याचा पवित्रा या मूर्तिकारांनी घेतला आहे.
चारकोप येथे ‘पीओपी’ मूर्तींच्या विसर्जनाला मनाई करण्यात आल्यानंतर मुंबईसह राज्यभरातील मूर्तिकार व गणेशोत्सव मंडळांचे पदाधिकारी रविवारी परळ येथील शिरोडकर हायस्कूलच्या सभागृहात एकत्र आले. ‘पीओपी’ला पर्याय नसेल, तर विसर्जनास अडथळा कशासाठी? ही बंदी तर्कहीन आहे. पर्यावरणपूरक पर्याय उपलब्ध होत नाहीत, तोपर्यंत हा निर्णय मागे घ्यावा.
मूर्तिकार, गणेशमंडळांना विश्वासात घेऊन व न्यायालयाचा आदर राखून प्रशासनाने कृती करावी’, अशी मागणी संघटनेचे पदाधिकारी हितेश जाधव यांनी केली. तर, ‘‘पीओपी’बंदीआधी सरकारने योग्य पर्याय द्यावा’, अशी प्रतिक्रिया संतोष कांबळी, सुरेश शर्मा, सिद्धेश दिघोळे, सतीश वळीवडेकर, कुणाल पाटील आदी मूर्तिकारांनी व्यक्त केली. पीओपी’बंदी मागे न घेतल्यास तीव्र आंदोलन छेडू’, असा इशारा संघटनेचे अध्यक्ष प्रशांत देसाई यांनी दिला.
त्या’ मूर्तींचा अपवाद करावा‘न्यायालयाच्या निर्णयापूर्वीच काही पीओपी मूर्तींची प्राणप्रतिष्ठा करण्यात आली असून त्या मूर्ती श्रद्धेचे स्थान झाल्या आहेत. त्यामुळे महानगरपालिका व पोलिसांनी त्या मूर्तींच्या विसर्जनाची व्यवस्था करावी, अशी सूचना मी महापालिकेच्या आयुक्तांना व मुंबई पोलिसांच्या विशेष आयुक्तांना केली आहे,’ असे राज्याचे मंत्री आशीष शेलार यांनी सांगितले.