सात किलो सोने स्वस्तात देण्याचे आमिष दाखवून नागपूरच्या सराफाकडून दीड कोटी रुपये लुटल्याप्रकरणी, रायगडच्या दोन पोलिसांसह चौघांना अटक करण्यात आली आहे.
अलिबागमधील समाधान पिंजारी याने नागपूर येथील सोने व्यापारी नामदेव हुलगे यांना संपर्क साधून, शंकर कुळे याच्याकडे सात किलो सोने असून ते पाच कोटींना देणार असल्याचे सांगितले. हुलगे हे दीड कोटी रुपये घेऊन समाधानसोबत ४ फेब्रुवारी रोजी अलिबाग येथे निघाले. मात्र समाधान याने भूलथापा देऊन तीनवीरा धरणाजवळ गाडी थांबवली. अलिबाग पोलिस ठाण्याचे अंमलदार समीर म्हात्रे व विकी साबळे हे पोलिस गणवेशात दुचाकीवरून तिथे आले आणि गाडीतून सर्वांना खाली उतरवले. तेवढ्यात समाधानचा साथीदार दीप गायकवाड हा पैशांसह गाडी घेऊन निघून गेला. त्यांना पकडण्यासाठी म्हणून पोलिसही निघून गेले. त्यानंतर, समाधान याने सोने असलेल्या घरावर पोलिसांचा छापा पडल्याचे सांगत, अटकेची भीती घालून सर्वांना निघून जाण्यास सांगितले.
त्यानंतर ५ फेब्रुवारीला अलिबाग पोलिस ठाण्यातील पोलिस हवालदार हनुमंत सूर्यवंशी याने हुलगे यांना संपर्क साधून, २ कोटी रुपये घेऊन या, अन्यथा अटक करू, अशी धमकी दिली. यानंतर फिर्यादीने ७ फेब्रुवारीला रायगड पोलिस अधीक्षक सोमनाथ घार्गे यांची भेट घेऊन घटना सांगितली. त्यानंतर तपासाची चक्रे फिरली व समाधान पिंजारी, शंकर कुळे, पोलिस हवालदार हनुमंत सूर्यवंशी व एक अनोळखी पोलिस तसेच इनोव्हा गाडीचालक यांच्याविरुद्ध गुन्हा दाखल केला. पोलिस निरीक्षक बाळासाहेब खाडे यांनी गुन्ह्याचा तपास चालू केला. समाधान पिंजारी, गाडीचालक दीप गायकवाड, पोलिस अंमलदार समीर म्हात्रे व विकी साबळे यांना अटक करण्यात आली.