शिरपूर तालुक्यातील बुडकी गावात पत्नीने पतीस तुम्ही रोज दारु पिऊन का येतात, अशी विचारणा केली. या कारणावरुन राग आलेल्या पतीने पत्नीच्या पोटावर व कमरेवर लाथाबुक्क्यांनी अमानुष मारहाण केली. या बेदम मारहाणीत पत्नी जागीच ठार झाली. या प्रकरणी शिरपूर तालुका पोलीस ठाण्यात पतीविरुध्द खुनाचा गुन्हा दाखल करण्यात आला आहे.
मिळालेल्या माहितीनुसार, बुडकी ता.शिरपूर गावातील रहिवासी आत्माराम बोन्या पावरा (वय ३०) यास दारुचे व्यसन असल्याने तो रोज दारु पिऊन यायचा आणि पत्नी सुमन आत्माराम पावरा (वय ३०) हीस मारझोड करीत असे. दि.२३ रोजी रात्री ११ वाजेच्या सुमारास आत्माराम पावरा हा नेहमीप्रमाणे दारु पिऊन आला. त्यामुळे त्याची पत्नी सुमन हीने त्यास तुम्ही रोज का दारु पिऊन का येतात, अशी विचारणा केली. या कारणावरुन आत्मारामला राग आला. त्याने पत्नी सुमनला मारहाण करण्यास सुरवात केली. यावेळी त्याने सुमनच्या पोटावर व कमरेवर अमानुषपणे लाथाबुक्क्यांनी मारहाण केली.
या मारहाणीत सुमन पावरा ही गंभीर जखमी झाली. तीला लागलीच बोराडी येथील रुग्णालयात दाखल करण्यात आले. परंतु तिची प्रकृती अधिकच गंभीर असल्यामुळे तिला शिरपूर येथील उपजिल्हा रुग्णालयात दाखल करण्यात आले. यानंतर तिला पुढील उपचारासाठी धुळे जिल्हा रुग्णालयात हलविण्यात आले. उपचारादरम्यान सुमन पावरा हीचा मृत्यू झाला. या प्रकरणी सुमन पावरा हीचा भाऊ धरमसिंग शिवदास पावरा रा. कोडीद ता. शिरपूर याने शिरपूर तालुका पोलीस ठाण्यात दिलेल्या फिर्यादीवरून आत्माराम पावरा याच्याविरुध्द भारतीय न्याय संहिता कायदा कलमान्वये खूनाचा गुन्हा दाखल करण्यात आला आहे. पुढील तपास पोलीस उपनिरीक्षक मिलिंद पवार करीत आहे.