मोबाईल चोरीच्या संशयावरून युवकाला बांधून ठेऊन त्याला बेदम मारहाण केल्यामुळे २८ वर्षीय अनोळखी व्यक्तीचा जीव गेल्याची घटना २७ सप्टेंबर शुक्रवारी पहाटेच्या सुमारास तळोदा शहरात घडली. या प्रकरणी ६ जणांविरुद्ध हत्येचा गुन्हा दाखल करण्यात आला आहे.
ळोदा शहरातील बालाजी पेट्रोल पंप परिसरात बिहार येथील काही कुटुंब उघड्या जागेवर झोपडी करुन राहत आहेत. त्याठिकाणी पाऊस अधिक पडत असल्याने रंजयकुमार रामदेव पासवान (वय २८, रा.जितपुर, बिहार) हा अनोळखी युवक आश्रयासाठी तेथे आला होता. तेथील कुटुंबीयांनी त्यास आश्रय दिला. काहीवेळाने अनोळखी रंजयकुमार यांनी आश्रयदाते कुटुंबातील सदस्याचा मोबाईल चोरून फरार झाल्याचा संशय कुटुंबातील सदस्यांना आल्याने त्यांनी त्याचा शोध घेतला. दरम्यान, तळोदा बसस्टॉप जवळून त्याला पकडून आणले. पेट्रोल पंपसमोरील शॉपिंगसमोर त्याला दोराने बांधून ५ ते ६ जणांनी लाठी काठीने बेदम मारहाण करून त्याला जबर दुखापत केली.
शुक्रवारी पहाटेच्या सुमारास पोलीस हेल्पलाईन ११२ नंबरवर कॉल करून आम्ही चोर पकडला असून त्याला पेट्रोल पंपासमोर बांधून ठेवले आहे. आपण लवकर या ठिकाणी येऊन त्यास ताब्यात घ्या, असे सांगितले. दरम्यान, पोलीस कर्मचाऱ्यांनी घटनास्थळी जाऊन परिस्थिती लक्षात घेता तात्काळ रिक्षा बोलावून त्याला रुग्णालयात नेण्यास सांगितले. मात्र संबंधितांनी त्याला रुग्णालयात न नेता पोलीस ठाण्यात आणले. ठाणे अंमलदार यांनी रंजयकुमार याला रुग्णालयात पाठवले असता उपजिल्हा रुग्णालयात पोहचण्यापूर्वीच त्याचा मृत्यू झाला असल्याचे उपजिल्हा रुग्णालयातील डॉक्टरांनी घोषित केले. मृतदेह शवगृहात हलविण्यात आला आहे. घटनास्थळी उपविभागीय पोलीस अधिकारी दर्शन दुगड, अतिरिक्त पो.अधिकारी आशित कांबळे, तळोदा पोलीस ठाण्याचे प्रभारी अधिकारी सहाय्यक पो.नि.आर.बी लोखंडे तसेच पोलीस कर्मचारी दाखल झाले होते.
या प्रकरणी भारतीय न्याय सहिता १०३ अंतर्गत हत्येचा गुन्हा दाखल करण्यात आला आहे. पुढील तपास पोलीस अधीक्षक श्रवण दत्त यांच्या मार्गदर्शनाखाली तळोदा पोलीस निरीक्षक आर.बी लोखंडे हे करत आहेत. चौकशीसाठी काही जणांना पोलिसांनी ताब्यात घेतलं आहे.