राष्ट्रीय ग्रामीण रोजगार हमी योजनेंतर्गत (मनरेगा) दरवर्षी जून महिन्यात पर्यावरण सप्ताह साजरा करण्याचा निर्णय राज्य सरकारने घेतला आहे. या सप्ताहामध्ये ‘मनरेगा’अंतर्गत राज्यात मोठया प्रमाणात वृक्ष लागवडीचा कार्यक्रम हाती घेण्यात येणार आहे. प्राथमिक व माध्यमिक शाळांच्या आवारात, अंगणवाडी, आरोग्य केंद्रे, समाजमंदिर, गावठाण, गायरान जागा, ग्रामपंचायतीच्या मालकीच्या जमिनी, सरकारी, निमसरकारी कार्यालये तसेच रस्त्याच्या दुतर्फा विविध प्रकारची झाडे लावण्यात येतील. या कार्यक्रमासाठी प्रत्येक जिल्ह्यातील सर्व संबंधितांना योग्य प्रतीच्या रोपांचा पुरवठा करण्याचे आदेश पुण्यातील सामाजिक वनीकरण विभागाचे प्रधान मुख्य वनसंरक्षक व महासंचालकांना देण्यात आले असल्याचे मुंडे यांनी सांगितले.
राज्यातील सर्व जिल्हाधिकारी व मुख्य कार्यकारी अधिकाऱ्यांनी या सप्ताहाचे आयोजन करावे. जिल्ह्याचे पालकमंत्री, जिल्हा परिषद अध्यक्ष, लोकप्रतिनिधी यांच्या हस्ते ३ जूनला किमान एका गावामध्ये पर्यावरण सप्ताहाचा प्रारंभ करावा, अशा स्पष्ट सूचना देण्यात आल्या आहेत. या पर्यावरण सप्ताहामध्ये सक्रिय लोकसहभाग घेण्यात येणार असून, वृक्ष लागवडीच्या कार्यक्रमाचे गावनिहाय नियोजन केले जाणार आहे. प्रत्येक जिल्हाधिकारी आणि जिल्हा परिषदेच्या मुख्य कार्यकारी अधिकाऱ्यांनी याबाबतचा अहवाल २० जूनपर्यंत विभागीय आयुक्तांना सादर करायचा आहे, असे सरकारी म्हटले आहे.
‘मोहिमेला हातभार लावा’
राज्यातील सर्व नागरिकांनी पर्यावरण सप्ताहात सहभागी होऊन आपले राज्य ‘हरित राज्य’ करण्याच्या तसेच वृक्षारोपणाच्या माध्यमातून राज्य दुष्काळमुक्त करण्याच्या मोहिमेला हातभार लावावा, असे आवाहन मुंडे यांनी यावेळी केले.