महागड्या मोबाईल व अन्य उपकरणांची हौस पूर्ण करण्यासाठी गुजरातमधील बडोदा येथील १३ वर्षाची मुलगी वेश्याव्यवसायात गेल्याची धक्कादायक घटना समोर आली आहे. धक्कादायक बाब म्हणजे मुलीच्या आईला या प्रकाराची माहिती मुलगी गर्भवती झाल्यानंतर समजली. सध्या या मुलीवर समुपदेशन सुरु आहे.
बडोद्यातील सुभानपूरा येथे एका महिलेचे ग्रॉसरी शॉप असून या महिलेला १३ वर्षांची मुलगी आहे. महिलेच्या पतीचे तीन वर्षांपूर्वी निधन झाले होते. या महिलेच्या १३ वर्षाच्या मुलीला महागड्या उपकरणांचे वेड लागले. मैत्रिणींकडे असलेले महागडे मोबाईल व अन्य उपकरणं आपल्याकडेही असावीत असे तिला वाटत होते. पण कुटुंबाची आर्थिक स्थिती फारशी चांगली नसल्याने तिच्या आईला ही हौस पूर्ण करणे शक्य नव्हते. ही हौस भागवण्यासाठी त्या अल्पवयीन मुलीने चक्क वेश्याव्यवसायात जाण्याचा निर्णय घेतला. मुलीची आई दिवसभर दुकानात असल्याने तिच्या घरी कोणीही नसते. याचाच फायदा घेत त्या मुलीने ग्राहकांना थेट घरी बोलवायला सुरुवात केली. यासाठी तिने एक मोबाईल क्रमांकही मिळवला व हा नंबर तिच्या आईकडेही नव्हता. काही दिवसांपूर्वी मुलगी गर्भवती असल्याचे त्या महिलेला समजले व त्यांना धक्काच बसला. त्यांनी मुलीला जाब विचारल्यावर हा सगळा प्रकार उघड झाला. सध्या मुलीचे समुपदेशन सुरु असून तिची समजूत काढण्याचे प्रयत्न सुरु आहे.