आश्रमशाळेतील विद्यार्थिनींना प्रसाधनगृहाच्या स्वच्छतेच्या कामाला जुंपल्याचा धक्कादायक प्रकार मुरबाड तालुक्यात समोर आला आहे. माळ आश्रमशाळेमधील या प्रकारचा व्हिडीओ व्हायरल झाल्यानंतर सर्वच स्तरांतून याबाबत टीका केली जात आहे. या प्रकारातील दोषींवर तात्काळ कडक कारवाई करण्याची मागणी संबंधित विद्यार्थिनींच्या पालकांनी केली आहे. या विरोधात संतप्त पालक आणि विद्यार्थिनींनी सोमवारी ठाणे येथील आदिवासी विकास विभागाच्या अपर आयुक्त कार्यालयाबाहेर ठिय्या देत न्याय मिळवून देण्याची विनंती केली.
मुरबाडच्या माळ आश्रमशाळेत साफसफाईसाठी रोजंदारी सफाई कामगारांची नेमणूक करण्यात आली आहे. मात्र या कामगारांकडून स्वच्छतेचे काम करून घेण्याऐवजी आश्रमशाळेतील विद्यार्थिनींना या कामाला जुंपले जात आहे. आश्रमशाळेतील खोल्यांच्या साफसफाईसह त्यांच्याकडून प्रसाधनगृहे आणि शौचालय स्वच्छतेचे काम करून घेतले जात असल्याचा व्हिडीओ वायरल झाला होता. साफसफाई करताना मास्क, हॅण्डग्लोव्ह्जही नसल्याचे दिसून आले. मुळात साफसफाईचे काम मुलांकडून करून घेण्यास बंदी आहे. असे असतानाही आश्रमशाळेत असे प्रकार सर्रास सुरू असल्याचे पालकांनी सांगितले.
सात दिवसांची मुदत
आदिवासी विकास विभागाच्या कार्यालयाबाहेर आंदोलन करणाऱ्या पालकांनी सात दिवसांची मुदत प्रशासनाला दिली आहे. या काळात संबंधितांवर कारवाई न झाल्यास पुन्हा ७ ऑगस्ट रोजी आंदोलन करणार असल्याचा इशारा यावेळी पालकांनी दिला. याप्रश्नी पथक मुरबाड येथे आश्रमशाळेत गेले होते. मात्र विद्यार्थिनी आणि पालक ठाण्यात आल्याने त्यांची भेट झाली नाही. विद्यार्थिनींचे जबाब नोंदवून या प्रकरणात कोणी दोषी आढळल्यास कारवाई केली जाईल, अशी माहिती आदिवासी विकास विभाग कार्यालयाच्या कार्यालय अधीक्षक संगीता शेटे यांनी दिली.