वीजेचे बिल भरले नाही, असे सांगून नागरिकांना गंडा घालण्याचे प्रकार सातत्याने घडत आहेत. मुंबई पोर्ट ट्रस्टच्या एका माजी कर्मचाऱ्यालाही वीजबिलापोटी तब्बल सहा लाखांचा फटका बसला आहे. महावितरणचा अधिकारी असल्याचे भासवून एका व्यक्तीने त्याच्या खात्यामधून टप्प्याटप्प्याने पैसे परस्पर वळवले. याप्रकरणी त्या सेवानिवृत्त कर्मचाऱ्याच्या तक्रारीवरून नवघर पोलिस ठाण्यात गुन्हा दाखल करण्यात आला आहे.
मुलुंड येथे वास्तव्यास असलेले संग्रामसिंग (बदललेले नाव) हे २००३ मध्ये मुंबई पोर्ट ट्रस्टमधून सेवानिवृत्त झाले. घरी असताना त्यांच्या मोबाइलवर एक संदेश आला. तुमचे वीजबिल भरले नसून तात्काळ न भरल्यास रात्री साडेनऊ वाजता विजेची जोडणी कापण्यात येईल, असे त्यात नमूद करण्यात आले होते. त्या संदेशात एक मोबाइल क्रमांक देण्यात आला होता. संग्रामसिंग यांनी त्या मोबाइलवर संपर्क केला असता समोरील व्यक्तीने महावितरणचा अधिकारी असल्याचे सांगितले.
संग्रामसिंग यांनी, ‘कार्यालयात जाऊन बिल भरता येणे शक्य नाही, मात्र मी ॲानलाइन पैसे भरू शकतो’ असे सांगितले. त्यावर कथित अधिकाऱ्याने त्यांना एक ॲप डाउनलोड करायला भाग पाडले. संग्रामसिंग यांनी ॲप डाऊनलोड केल्यावर, पैसे कसे भरणार? अशी विचारणा करण्यात आली. यावर त्यांनी डेबिट कार्डच्या माध्यमातून भरणार असल्याचे सांगितले. अधिकाऱ्याने या डेबिट कार्डचा तपशील ॲपवर भरण्यास सांगितले. तपशील ॲपवर भरल्यानंतर अधिकाऱ्यांनी मोबाइलवर आलेले ओटीपी संग्रामसिंग यांनी दिले.
त्या भामट्याने संग्रामसिंग यांनी भरलेला डेबिट कार्डचा तपशील आणि ओटीपीच्या मदतीने त्यांच्या बँक खात्यातून टप्प्याटप्प्याने तब्बल सहा लाख रूपये परस्पर वळविले. पैसे वजा होत असल्याचे संदेश येऊ लागल्याने त्या अधिकाऱ्याला हटकण्यासाठी त्यांनी फोन केला. मात्र समोरून काहीच प्रतिसाद मिळत नव्हता. ओळखीच्या काहींना याबाबत विचारले असता त्यांनी ही सायबर फसवणूक असल्याचे सांगितले. त्यानंतर संग्रामसिंग यांनी मुलुंडच्या नवघर पोलिस ठाण्यात तक्रार केली.