प्रेशर कूकरचा स्फोट झाल्यानं स्वयंपाक करत असलेल्या महिलेचा मृत्यू झाल्याची दुर्दैवी घटना घडली. कुकर एखाद्या बॉम्बसारखा फुटला. त्याच्या स्फोटाचा आवाज २०० ते ३०० मीटरपर्यंत ऐकू आला. आवाज ऐकून शेजारपाजाराचे लोक घराबाहेर पडले. राजस्थानच्या जयपूरमधील झोटवाडातील भौमिया नगरमध्ये ही घटना घडली.
सोमवारी सकाळी दहाच्या सुमारास ही घटना घडली. झोटवाडा पोलिसांनी दिलेल्या माहितीनुसार, भौमिया नगरमधील ७१ क्रमाकांच्या खोलीत राहणाऱ्या ४७ वर्षीय किरण कंवर स्वयंपाक करत होत्या. त्यावेळी अचानक प्रेशर कुकरचा स्फोट झाला. कुकरचे तुकडे किरण यांच्या शरीरात घुसले. त्यामुळे त्या रक्तबंबाळ झाल्या. त्यांच्या अंगावर अनेक ठिकाणी जखमा झाल्या. त्यांचा चेहरादेखील पूर्णपणे जळून गेला. किरण यांनी जागीच जीव सोडला. घटना घडली त्यावेळी किरण घरात एकट्या होत्या.
शेजाऱ्यांनी किरण यांना हाका मारल्या. मात्र आतून कोणताही प्रतिसाद मिळाला नाही. त्यामुळे वसाहतीमधील एक महिला घरात गेली. तेव्हा त्यांना किरण स्वयंपाकघरात निपचित अवस्थेत पडलेल्या दिसल्या. त्यांच्या शरीरावर असंख्य जखमा झाल्या होत्या. किरण यांना अशा अवस्थेत पाहिल्यावर महिलेनं किंकाळी फोडली. त्यानंतर अन्य शेजारी घरात गेले. त्यांनी घटनेची माहिती पोलिसांना दिली. प्रेशर कूकरच्या स्फोटामुळे स्वयंपाकघराच्या छताचं आणि सामानाचं मोठं नुकसान झालं.
कूकरची शिट्टी खराब असल्यानं स्फोट झाल्याचं फॉरेन्सिक अधिकारी अभय प्रताप सिंह यांनी सांगितलं. ‘शिट्टी खराब झालेला कूकर वापरल्यानं हा प्रकार घडला. कूकरची शिट्टी जाम झाली होती. कूकरमध्ये वाफ तयार झाली. पण शिट्टी वाजली नाही. त्यामुळे आतील वाफ बाहेर पडली नाही. त्यामुळे प्रेशर वाढल आणि त्यामुळे कूकरचा स्फोट झाला,’ असं सिंह म्हणाले. कूकर किती वेळापासून गॅसवर ठेवला आहे? त्याची शिट्टी का होत नाही? याकडे बहुधा महिलेचं लक्ष गेलं नसावं, असं निरीक्षण त्यांनी नोंदवलं.