घराजवळ पार्क केलेली स्कॉर्पिओ गाडी शेजाऱ्याने मध्यरात्री जाळली. या आगीत अंदाजे सात लाख रुपयांचे नुकसान झाल्याचा दावा केला जात आहे. गाडीत ठेवलेले आरसी बुक व इतर कागदपत्रांसह रोख रक्कमही आगीच्या भक्ष्यस्थानी सापडली. बुलढाणा जिल्ह्यातील चिखली शहरातील जयस्तंभ चौक भागात २० मे च्या मध्यरात्री अडीच वाजताच्या सुमारास ही घटना घडली.
स्वप्निल उर्फ अप्पू गुप्ता यांची चारचाकी स्कॉर्पिओ गाडी शेजारी राहणाऱ्या नयन बोंद्रे यांनी जाळल्याचा आरोप आहे. अंदाजे सात लाख रुपयांचे नुकसान झाल्याची तक्रार स्वप्निल गुप्ता यांनी पोलीस स्टेशनला केली आहे.
यासंदर्भात गुप्ता यांनी पोलीस स्टेशनला दिलेल्या फिर्यादीनुसार वीस मे रोजी त्यांनी आपली पांढऱ्या रंगाची महिंद्रा स्कॉर्पिओ गाडी क्रमांक एम एच 28 वी 6263 नेहमीप्रमाणे घराच्या पाठीमागील बाजूला लॉक लावून उभी करून ठेवले होती. घराच्या पाठीमागील बाजूस गोडाऊन समोर वाहन ठेवलेल्या ठिकाणी 21 मे रोजी मध्यरात्री ब्लास्ट झाल्याचा आवाज आला. तेव्हा आवाजामुळे त्यांना जाग आल्याने घराच्या पाठीमागील पाहिले असता त्यांची महिंद्रा कंपनीची गाडी पेट घेतल्याचं दिसलं.
आवाज ऐकून घराशेजारील आजूबाजूचे लोक सुद्धा घटनास्थळी आले व त्यांनी गाडीला लागलेली आग विझवण्याचा प्रयत्न केला. मात्र अग्निशमन दलाचे जवान येईपर्यंत गाडी पूर्णपणे जळालेली होती.
त्यानंतर शेजारील घरामध्ये असलेले व गाडीमध्ये असलेल्या कॅमेराचे सीसीटीव्ही फुटेज चेक केले असतात गुप्तांच्या शेजारी राहणारा नयन विलास अप्पा बोंद्रे हा गाडीला आग लावून ती पेटल्यानंतर स्वतःच्या घरामध्ये पळून जाताना दिसला.
या आगीमध्ये अंदाजे सात लाख रुपयांचे तसेच गाडीमध्ये ठेवलेल्या गाडीचे आरसी बुक व इतर कागदपत्राचे, नगदी रोख रकमेचे तसेच शेलगाव आटोळे येथील प्लॉटिंगचे कागदपत्र सुद्धा जळून खाक झाले, अशा आशयाच्या तक्रारीवरून पोलिसांनी गुन्हा दाखल करत आरोपीला ताब्यात घेतले आहे.