ऑनलाइन गेममध्ये पैसे हरल्याच्या तणावातून सुशिक्षित तरुणाने आयुष्य संपवलं. २३ वर्षीय युवकाने हर्सूल तलावात उडी घेऊन आत्महत्या केली. ही धक्कादायक घटना छत्रपती संभाजीनगर जिल्ह्यात शुक्रवार दि. ५ मे रोजी दुपारी चार वाजता उघडकीस आली आहे. या घटनेची माहिती मिळताच नातावेईकांनी घाटी रुग्णालयात धाव घेऊन टाहो फोडला. या प्रकरणी हर्सूल पोलीस ठाण्यामध्ये आकस्मिक मृत्यूची नोंद करण्यात आली आहे.
या प्रकरणी नातेवाईकांनी दिलेल्या माहितीनुसार, गौरव चंद्रकांत पवार (वय २३ वर्ष, रा. पवन नगर टीव्ही सेंटर) असे आत्महत्या केलेल्या तरुणाचे नाव आहे. त्याने मेकॅनिकल डिप्लोमापर्यंत शिक्षण पूर्ण केलं होतं. त्याचं वडील शेती करता आई गृहिणी आहे. सध्या तो एका खाजगी कंपनीत काम करत होता. गौरव हा एकुलता एक असून त्याच्या दोन बहिणींचे लग्न झालेले आहे.
गौरव याला गेले काही दिवसांपासून ऑनलाईन गेम खेळण्याचा सवय लागली होती. यामध्ये तो पन्नास हजार रुपये हरले असल्याची माहिती नातेवाईकांनी दिली. हरलेले पैसे भरण्यासाठी गौरवच्या मामाने गौरवला चाळीस हजार रुपये दिले. मात्र तरीही तो ताणतणावात होता.
दरम्यान शुक्रवार दि. ५ मे रोजी सकाळी गौरवने घरी वडिलांसोबत जेवण केलं. आई वडिलांना बीड येथे जाण्यासाठी पाठवले. दुपारच्या सुमारास गौरव हा हर्सूल तलाव परिसरात आला. काही वेळ तो तलावाच्या काठावर बसलेला होता. काही वेळातच त्याने तलावात उडी घेतलीकाही वेळाने ही बाब सुरक्षारक्षक राजेश गवळे यांच्या लक्षात येताच घटनेची माहिती हर्सूल पोलिसांना दिली. पोलिसांच्या मदतीने त्याला बाहेर काढून घाटी रुग्णालयात दाखल केले असता डॉक्टरांनी तपासून मृत घोषित केले.
या प्रकरणी हर्सूल पोलीस ठाण्यामध्ये आकस्मिक मृत्यूची नोंद करण्यात आली असून पुढील तपास सा. फौ. एस. आर. वाघ करीत आहेत. घटनेची माहिती मिळताच नातवेईकांनी घाटी रुग्णालयात धाव घेतली. यावेळी त्याची आई वडील बहीण यांनी टाहो फोडला. एकुलता एक मुलगा गमावल्यामुळे पवार कुटुंबावर दुःखाचा डोंगर कोसळला आहे.