ठाण्याच्या घोडबंदर रोडवरील ओरियन बिझनेस पार्कमध्ये झालेल्या अग्निकल्लोळाला दोन आठवडे उलटत नाही तोच शुक्रवारी मानपाडा नाक्यावर असलेल्या दोन दुकानांना सकाळी मोठी आग लागली. या दुकानांच्या मागे असलेल्या टायटन हॉस्पिटललाही आगीची झळ बसण्याधीच अग्निशमन दलाने घटनास्थळी धाव घेत आगीवर नियंत्रण मिळवण्यासाठी शर्थीचे प्रयत्न सुरू केल्याने मोठा अनर्थ टळला. तब्बल दोन तासांनी आग आटोक्यात आली. तोपर्यंत याठिकाणी असलेले प्लायवूड आणि केकचे दुकान पूर्णपणे जळून खाक झाले होते. या दुर्घटनेत कोणतीही जीवितहानी झाली नसून लाखोंचे नुकसान झाल्याचा प्राथमिक अंदाज वर्तवण्यात येत आहे.
घोडबंदर रोडवरील मानपाडा नाक्यावर असलेल्या टायटन हॉस्पिटलसमोर सेवा रस्त्याला लागून दुकाने थाटण्यात आली आहेत. याठिकाणी असलेल्या जिनेश जैन यांच्या प्लायवूड शॉप व मिलिंद चौहान यांच्या केक शॉपला सकाळी नऊच्या सुमारास आग लागली. अवघ्या काही मिनिटांतच आगीने रौद्र रूप धारण केले. प्लायवूडच्या दुकानातील लाकडी साहित्यामुळे ही आग झपाट्याने पसरली. या आगीच्या झळा शेजारील दुकानांसह एका दुचाकीला बसल्या. घटनेची माहिती मिळताच अग्निशमन दलाचे जवान एक रेस्क्यू वाहन, दोन फायर वाहने, दोन वॉटर टँकर, २ जंबो वॉटर टँकर आणि एक – टी टीएल मशीनसह घटनास्थळी दाखल झाले. त्यांनी आगीवर नियंत्रण मिळवण्यास सुरुवात केली. तसेच आपत्ती व्यवस्थापन पथकाचे कर्मचारी, दोन रुग्णवाहिका, एक जे.सी.बी. मशीन व एक पोकलेन मशीन घेऊन पालिका प्रशासनाचे पथक घटनास्थळी आले. दोन तासांच्या शर्थीच्या प्रयत्नानंतर आगीवर नियंत्रण मिळवण्यात यश आले.
बघ्यांची गर्दी…रुग्णांच्या नातेवाईकांची पळापळ
मानपाडा नाक्यावरच सकाळी ऐन गर्दीच्या वेळी अग्नितांडव झाल्याने बघ्यांची एकच गर्दी घटनास्थळी उसळली होती. त्यातच आगीच्या भक्ष्यस्थानी पडलेल्या दुकानांच्या मागेच टायटन रुग्णालय असल्याने येथे दाखल रुग्णांच्या नातेवाईकांची एकच पळापळ झाली. रुग्णालय प्रशासनाने खबरदारीचा उपाय म्हणून रुग्णांना सुरक्षित स्थळी हलवले. बचाव पथकाने आगीवर नियंत्रण मिळवल्याने रुग्णांच्या नातेवाईकांनी सुटकेचा निश्वास सोडला.
आगीवर नियंत्रण मिळवण्यासाठी आलेल्या अग्निशमन दलाच्या गाड्या, रुग्णवाहिका, जेसीबी, पोकलेन आदींमुळे ठाण्याहून घोडबंदरकडे जाणाऱ्या वाहतुकीला फटका बसला. आधीच मेट्रोच्या कामामुळे अरुंद झालेल्या या मार्गावर वाहनांच्या लांबचलांब रांगा लागल्या होत्या. कोंडीचे टोक थेट कापूरबावडी जंक्शनपर्यंत पोहचले होते. त्यातच घटनास्थळासमोर असलेल्या उड्डाणपुलावरून आगीचे व्हिडीओ काढणाऱ्या बघ्यांच्या गर्दीने कोंडीत भर पडली. वाहतूक पोलिसांची ही कोंडी सोडवताना पुरती दमछाक झाली.