बंगळुरू येथील एका वैद्यकीय कॉलेजमध्ये मुलीला एमबीबीएसला प्रवेश घेऊन देण्याचे खोटे आमिष दाखवून दोघांनी ठाण्यातील एका व्यक्तीची १३ लाखांची फसवणूक केली आहे. विशेष म्हणजे, मुलीच्या प्रवेशाबाबत समोरून उडवाउडवीची उत्तरे मिळाल्यानंतर तिच्या वडिलांनी थेट बंगळुरूमधील कॉलेजमध्ये जाऊन चौकशी केली. त्यावेळी भामट्यांनी एमबीबीएसच्या प्रवेशाबाबत दिलेली कागदपत्रे खोटी असल्याची बाब स्पष्ट झाली. या प्रकरणी कापूरबावडी पोलिस ठाण्यात फसवणूक, माहिती तंत्रज्ञान आणि अन्य कलमांअंतर्गत गुन्हा दाखल झाला आहे.तक्रारदार ठाण्यातील कोलशेत परिसरात राहतात. गेल्या वर्षी नोव्हेंबरमध्ये राजीव केडिया नामक व्यक्तीने त्यांना बंगळुरू येथील वैद्यकीय कॉलेजमध्ये स्पॉन्सरशिपअंतर्गत प्रवेश घेऊन देतो, असे सांगितले होते. त्यामुळे तक्रारदार यांनी मुलीच्या एमबीबीएसच्या प्रवेशाबाबत केडिया याच्याकडे चौकशी केल्यानंतर त्याने संबधित कॉलेजच्या एका वरिष्ठ अधिकाऱ्याबरोबर कॉन्फरस कॉलद्वारे तक्रादाराचे बोलणे करून दिले. या दोघांनी तक्रारदार यांना मुलीला संबधित मेडिकल कॉलेजमध्ये एमबीबीएसला प्रवेश घेऊन देण्याचे आमिष दाखवले. त्यासाठी तक्रारदाराकडे १३ लाखांची मागणी करण्यात आली. त्यामध्ये शैक्षणिक फी, राहण्याचा आणि अन्य खर्चाचा समावेश होता. तसेच हे पैसे तीन टप्प्यांमध्ये भरावे लागतील, असेही त्यांना सांगण्यात आले होते. मुलीला एमबीबीएसला प्रवेश मिळत असल्याने तक्रारदार पैसे देण्यास तयार झाले. या चर्चेनंतर त्यांना एक लिंक पाठवण्यात आली. यामध्ये कर्नाटक शासनाचे संकेतस्थळ नमूद करण्यात आले होते. शिवाय आयडी आणि पासवर्डही देण्यात आला होता. त्यामुळे त्यांनी लॉगिन आयडी आणि पासवर्डच्या सहाय्याने या संकेतस्थळावर ऑनलाइन पाहणी केली.
नंतर केडिया याने तक्रारदाराच्या मुलीला ईमेलद्वारे काही कागदपत्रे पाठवली. ही कागदपत्रे पाहिल्यानंतर तक्रारदारांचा केडिया आणि दुसऱ्या एका संबधिक अधिकाऱ्यावर विश्वास बसल्याने केडिया याने सांगितल्यानुसार तक्रारदारांनी ऑनलाइन १३ लाख रुपये पाठवले. पैसे दिल्यानंतर तक्रारदाराने केडिया याला मुलीच्या प्रवेशाबाबत विचारणा केल्यानंतर तो उडवाउडवीची उत्तरे देऊ लागला. त्यामुळे तक्रारदार थेट बंगळुरूमधील त्या वैद्यकीय कॉलेजमध्ये गेले. त्यांनी मुलीच्या प्रवेशाबाबत कॉलेजमध्ये चौकशी केल्यानंतर केडिया आणि दुसऱ्या एका आरोपीने जे काही सांगितले होते, ते खोटे असल्याचे समजले. ईमेलवर पाठवलेली कागदपत्रेही बनावट होती.
‘भूलथापांना बळी पडू नये’
या फसवणुकीबाबत एका पोलिस अधिकाऱ्याला विचारले असता, आरोपी राज्याबाहेरील असून तपास चालू असल्याचे त् त्याने सांगितिले. तसेच नागरिकांनीदेखील अशा कोणत्याही भूलथापांना बळी पडू नये, शिवाय अशा प्रकारे कोणी प्रवेशाबाबत आमिष दाखवत असल्यास नागरिकांनी चौकशी करणे आवश्यक असल्याचे अधिकाऱ्याचे म्हणणे आहे.