मुंबईहून गो एअरच्या विमानाने येणाऱ्या प्रवाशाकडून येथील डॉ. बाबासाहेब आंबेडकर आंतरराष्ट्रीय विमानळावर कस्टम्स विभागाने तब्बल १ किलो २३६ ग्रॅम सोने जप्त केले. अब्दुल रकीब असे प्रवाशाचे नाव असून त्याला ताब्यात घेण्यात आले आहे. मुख्य म्हणजे सोन्याची ही तस्करी अंतर्वस्त्रात लपवून करण्यात येत होती.
प्राप्त माहितीनुसार, गो एअरच्या विमान क्रमांक जी ८-०२६०१ विमानाने आरोपी प्रवास करून नागपूरला आला होता. संबंधित व्यक्तीबद्दल कस्टम अधिकाऱ्यांना संशय आल्याने त्याला थांबवून तपासणी करण्यात आली असता अंतर्वस्त्रातून सोन्याची तस्करी केली जात असल्याचे उघड झाले. नागपूर विमानतळावर कस्टम विभागाच्या अधिकाऱ्यांनी केलेल्या कारवाईमध्ये त्याच्याकडून १ किलो २३६ ग्राम सोने जप्त करण्यात आले.
अशाप्रकारे घरगुती उड्डाणादरम्यान सोन्याची तस्करी होण्याची ही पहिलीच घटना सांगण्यात येत आहे. नागपूरला आलेल्या या प्रवाशाची झडती घेतली असता हा संपूर्ण प्रकार समोर आला. तस्करी करणाऱ्या व्यक्तीला कस्टम विभागाने ताब्यात घेतले आहे. जप्त करण्यात आलेल्या या सोन्याची एकूण किंमत ६८ लाख ६० हजार रुपये इतकी असल्याचे सांगितले जात आहे.