शहरातील मानपाडा येथील एका शाळेत बुधवारी दुपारच्या खेळाच्या तासादरम्यान भोवळ येऊन पडलेल्या विद्यार्थ्याचा रुग्णालयात मृत्यू झाला.
मानपाडा येथील या संबंधित शाळेत बुधवारी खेळाचा तास सुरू होता. या तासानंतर संबंधित विद्यार्थी वर्गाबाहेर पडला; पण तेथे तो भोवळ येऊन पडला. शिक्षकांनी त्यास रुग्णालयात दाखल केले. परंतु डॉक्टरांनी त्याला मृत घोषित केले. या घटनेनंतर ठाणे शहरातील राजकीय पक्षांकडून आणि सामाजिक कार्यकर्त्यांकडून या मुलाच्या मृत्यूचे नेमके कारण शोधून काढण्याची मागणी करण्यात आली आहे. या प्रकरणी कापूरबावडी पोलिसांनी मृत्यूची नोंद केली असून, आवश्यक तपास करण्यात येईल, असे पोलिसांकडून स्पष्ट करण्यात आले आहे. ठाणे जिल्हा रुग्णालयात मुलाचे शवविच्छेदन करण्यात येणार आहे.