हिमालय पुलाचे गर्डर १०० वर्षे टिकणार असल्याचा दावा; नववर्षात पादचाऱ्यांसाठी पूल होणार खुला

छत्रपती शिवाजी महाराज टर्मिनस येथील हिमालय पुलाचे काम वेगाने सुरू करण्यात आले आहे. या पुलासाठी खास ओडिशा येथून स्टेनलेस स्टीलचे १२० टनांचे ५ गर्डर दाखल झाले आहेत. हे गर्डर किमान १०० वर्षे टिकतील एवढे मजबूत असल्याचा दावा करण्यात आला आहे. नवीन वर्षात हा पूल पादचाऱ्यांसाठी खुला केला जाणार आहे.

सीएसएमटी येथील हिमालय पुलाचा भाग कोसळून १४ मार्च २०१९ रोजी मोठी दुर्घटना घडली होती. त्यात सात जणांचा मृत्यू झाला होता. गेल्या चार वर्षांपासून रखडलेल्या या पुलाचे २०२२ मध्ये वेगाने काम सुरू झाले आहे. पुलाची लांबी ३० मीटर व रुंदी ९ मीटर असणार आहे. सुमारे ११ कोटी रुपये खर्च करून हा पूल उभारण्यात येत आहे. आत्तापर्यंत टाइम्स ऑफ इंडिया व सीएसएमटी रेल्वे स्थानक या दोन्ही बाजूंना प्रत्येकी एक याप्रमाणे दोन पिलर्स उभारण्यात आले असून उतरण्यासाठी पायऱ्या उभारण्याचे काम सुरू आहे.

पुलाचे सर्व पिलर बांधून तयार आहेत. दुर्घटनेनंतर पालिकेच्या पूल विभागाकडून पूल बांधण्याबाबतचा आराखडा तयार करण्यात आला होता. नवीन आराखड्यानुसार हिमालय पूल स्टेनलेस स्टीलचा बांधण्यात येत आहे. या पुलाचे काम सध्या अंतिम टप्प्यात आले आहे.

हा पूल डी. एन. रोड या प्रचंड रहदारीच्या मार्गावर असून या पुलावरून दररोज हजारो प्रवाशांची वर्दळ असते. त्यामुळे पुलाच्या बळकटीकरणावर अधिक भर दिला जातो आहे. पुलासाठी ओडिशावरून मागवलेले स्टेनलेस स्टीलचे गर्डर मजबूत असून त्यांना गंज पकडणार नाही, असा दावा करण्यात आला आहे. वाहतूक विभागाच्या परवानगीनंतर हे गर्डर बसवले जाणार आहेत. नवीन वर्षात फेब्रुवारी ते मार्चअखेरपर्यंत हा पूल प्रवाशांच्या सेवेत असेल, असा विश्वास पालिकेच्या पूल विभागातील अधिकाऱ्याने व्यक्त केला.
दीड महिन्यात काम पूर्ण होणार?
एकूण ५ गर्डर असून एक गर्डर ३५.२११ मीटर लांबीचा आहे. गर्डर बसवल्यानंतर सीमेंटचा स्लॅब टाकण्यात येणार आहे. हे काम पुढील एक ते दीड महिन्यांत पूर्ण करण्याचा प्रयत्न राहणार आहे. या पुलाला सरकते जिने बसवले जाणार असल्याने वयोवृद्ध, गरोदर महिलांसाठी ते सोयीचे ठरणार आहे.