भाजीपाल्यासह टोमॅटोची वाहतूक करणाऱ्या एका टेम्पोमध्ये भलामोठा अजगर प्रवास करत तो भाजी मार्केटमध्ये आल्याची घटना समोर आली आहे. ही घटना कल्याण पूर्वेतील कोळसेवाडी भागातील भाजी मार्केटमध्ये घडली आहे. मात्र, या अजगराला पाहून भाजी मार्केटमध्ये एकच गोंधळ उडाला.
टोमॅटोचे कॅरेट खाली करताना अजगर पाहून एकच गोंधळ उडाला. अहमदनगर, पुणे, नाशिकच्या ग्रामीण भागातील शेतीतून दिवसागणिक जवळपास १०० ते १५० ट्रक, टेम्पोमधून भाजीपाला, कांदे, बटाटे, टोमॅटोची वाहतूक करुन ते कल्याण डोंबिवलीमधील विविध भाजीपाला मार्केटमध्ये विक्रीसाठी आणले जाते.
अशाच एका ग्रामीण भागातून टोमॅटोची वाहतूक करणाऱ्या टेम्पोमधून एक अजगर थेट कल्याण पूर्वेतील भाजीपाला मार्केट प्रवास करून आला होता. मात्र, ज्यावेळी टेम्पोमधून टोमॅटोचे कॅरेट खाली करताना एका कामगाराचं लक्ष या अजगराकडे गेलं आणि त्यानंतर मार्केटमध्ये असलेल्या नागरिकांमध्ये एकच गोंधळ उडाला.
मार्केटमधील गोंधळ पाहून तातडीने प्रवीण जगताप ह्या भाजीपाला विक्रेत्याने सर्पमित्र स्वामी वराडकर आणि प्रथमेश डांगे यांना मोबाईलवर संर्पक करुन टेम्पोमध्ये टोमॅटो घेऊन आलेल्या टेम्पोमध्ये अजगर असल्याची माहिती दिली. माहिती मिळताच दोन्ही सर्पमित्र घटनास्थळी पोहोचले. त्यांनी पाहणी केली असता नागरिकांच्या गोंधळामुळे अजगर टेम्पोच्या चेसीमध्ये दडून बसला होता.
त्यानंतर या अजगराला सर्पमित्रांनी शिताफीने पिशवीत बंद केल्याने नागरिकांसह टेम्पो चालकाने सुटेकचा निश्वास घेतला. हा अजगर आठ फुट लांबीचा असून कल्याणचे वन विभागाचे आरएफओ चन्ने आणि वनपाल राजेंद्र शिंदे यांच्या देखरेखीत त्या अजगराला निसर्गात मुक्त करून जीवदान दिले आहे.