वेगवगेळ्या संशोधनामुळे आणि संकरित बियांमुळे सध्या हंगाम नसतानाही फळे, भाज्यांचे उत्पादन घेता येत आहे. त्यामुळे हंगाम नसतानाही वर्षभर भाज्या, फळे मिळत असतात. अशाच प्रकारे महाराष्ट्रातील सांगलीमधील एका शेतकरी कुटुंबातील संशोधकाने कलिंगडाच्या दोन वेगळ्या जाती निर्माण केल्या असून त्याद्वारे वर्षभर कलिंगडाचे उत्पादन घेता येणार आहे. विजय आणि विराट या नावाने त्यांनी या नवीन जाती विकसित केल्या आहेत. मराठी माणसाने पहिल्यांदा अशा प्रकारे कलिंगडाचे वाण विकसित केले आहे. या विकसित केलेल्या जातीमुळे कमी वेळात कलिंगडाचे उत्पादन मिळवता येणार असल्याने शेतकऱ्यांसाठी हे पीक मोठ्या प्रमाणात फायदेशीर ठरणार असल्याचा दावा संशोधक विकास नलावडे यांनी केला आहे. दसऱ्याच्या मुहूर्तावर त्यांची ही कलिंगडे बाजारात विक्रीसाठी दाखल झाली आहेत.
बाजारात कलिंगडांना वर्षभर मागणी असते. उन्हाळ्यात तर मोठ्या प्रमाणात कलिंगडाची मागणी वाढते. मात्र कलिंगडाचे उत्पादन घेण्यासाठी तीन ते चार महिन्यांचा अवधी द्यावा लागतो. मात्र या नवीन विकसित केलेल्या दोन जातींमुळे दोन महिन्यांत उत्पादन घेणे सहज शक्य होणार आहे. हे त्यांनी दाखवून दिले आहे. त्यांनी दोन महिन्यांपूर्वी लागवड केलेल्या या जातींना आता कलिंगडे आली असून एका कलिंगडाचे वजन दोन किलोच्या वर आहे. बाहेरून गडद हिरवे आणि आतून लालबुंद अशी ही कलिंगडे आहेत. शिवाय, चवीलाही अतिशय गोड असल्याचा दावा नलावडे यांनी केला आहे.
बाजारात कलिंगडाच्या किरण, बेला, नामधारी अशा काही ठराविक जाती आहेत. चवीला गोड असल्याने या सर्वांनाच बाजारात चांगली मागणी असते. आता हे नवीन वाण लोकांच्या पसंतीत कसे उतरेल, याकडे बाजार घटकांचे लक्ष लागले आहे. दसऱ्याच्या पूर्वसंध्येला बाजारात या कलिंगडाचा आगमन सोहळा पार पडला. आता दसऱ्याच्या मुहूर्तावर ते विक्रीसाठी ठेवले जाणार आहेत, अशी महिती व्यापारी महेश मुंडे यांनी दिली.