घर घेण्यासाठी पैशांची जमवाजमव केलेल्या वृद्ध दाम्पत्याची खासगी एजंट आणि मंत्रजप करणाऱ्या भोंदू बाबाने फसवणूक केल्याचा प्रकार समोर आला आहे. मंत्र जप करून एका मडक्यातून पैसे काढल्याचे भासवून वृद्ध दाम्पत्याकडून ५० लाख घेतले आणि रकमेत वाढ करण्याचे आमिष दाखविले. प्रत्यक्षात मात्र वाढीव रक्कम नाहीच पण मूळ रक्कमही मिळाली नाही. वृद्ध दाम्पत्याच्या तक्रारीवरून दहिसर पोलिस ठाण्यात गुन्हा दाखल करण्यात आला आहे.दहिसर येथील अरविंद आणि अरुणा (बदललेले नाव) हे दाम्पत्य स्वतःच्या मालकीचे घर नसल्याने मुलीच्या घरी राहत होते. अरुणा यांच्या माहेरची संपत्ती विकल्याने त्यातून साधारण ६७ लाख रुपये त्यांच्या वाट्याला आले होते. या रकमेच्या व्याजावर हे दोघे त्यांचा उदरनिर्वाह चालवत होते. स्वतःच्या मालकीचे घर घेऊन त्यामध्ये अखेरचे दिवस काढायचे, असा विचार करून त्यांनी दादर परिसरात घर शोधण्यास सुरुवात केली. याचवेळी प्रिया आणि अजित नावाच्या इस्टेट एजंटसोबत त्यांची ओळख झाली. अरविंद आणि अरुण यांनी दादर परिसरात ७० लाखापर्यंत घर हवे असल्याचे त्यांना सांगितले. यावर ९० लाखांपर्यंत घर येईल असे त्यांनी सांगितले. पण जर तुमच्याकडे ७० लाख रुपये असतील तर आमच्यासोबत चला. साताऱ्यामध्ये गणेश पवार नावाचे व्यक्ती असून, ते काही प्रात्यक्षिक करतात ते पाहून तुम्ही तुमचा निर्णय घ्या, असे वृद्ध दाम्पत्याला सांगितले.
अरविंद आणि अरुणा यांनी घेऊन काही इतर लोकांसह दोघेजण सातारा या ठिकाणी गेले. या ठिकाणी मंत्रजप करून पवार याने मडक्यातून काही नोटा काढल्या. अशाप्रकारे आपणासही पैशावर प्रात्यक्षिक करून रक्कम वाढवता येईल असे वृद्ध दाम्पत्याला सांगण्यात आले. त्यानुसार अरविंद आणि अरुणा यांनी आधी २५ लाख रुपये दिले. ही रक्कम मांत्रिकाने एका पेटाऱ्यात ठेवली आणि तीन दिवसांनी उघडण्यास सांगितली. मात्र, पेटाऱ्यामधून पैसे गायब होते. लक्ष्मीचा कोप झाला आहे पैसे परत मिळविण्यासाठी आणखी ३० लाख द्यायला सांगितले. वृद्ध दाम्पत्यांनी सर्व रक्कम मिळेल या अपेक्षेने आणखी रक्कमही दिली. मात्र, बरेच दिवस झाले, तरी पैसे न मिळाल्याने वृद्धाने दहिसर पोलिस ठाण्यात तक्रार केली.