मनसे पदाधिकाऱ्यांच्या भेटीगाठीच्या उद्देशाने मंगळवारी रात्री पुण्यात दाखल झालेल्या राज ठाकरेंनी बाजीराव रोडवरील अक्षरधारा बुक गॅलरीला भेट दिली होती. राज ठाकरे यांनी अक्षरधारा बुक गॅलरीत निवांतपणे बसून पुस्तकं चाळली. मराठी पुस्तकांच्या दुनियेत रमलेले राज ठाकरे पहिल्यांदा पहायला मिळाले. एवढच नाही तर राज ठाकरेंना तिथून निघताना थोडीथोडकी नव्हे तर तब्बल ५० हजार रुपयांची पुस्तकं विकत घेतल्याची माहिती समोर आली आहे. यामध्ये गोविंद सखाराम देसाई लिखित मराठी रियासतचे आठ खंड, मृत्युंजय,छावा, युगंधर नवीन आवृत्ती या पुस्तकांचा समावेश आहे. राज ठाकरे यांनी तब्बल दीड तास पुस्तकांच्या सानिध्यात घालवला. विविध प्रकारच्या पुस्तकांच्या दालनांची त्यांनी पाहणी केली. दुकानातून निघेपर्यंत राज ठाकरे यांनी तब्बल २०० पुस्तकं खरेदी केली होती. मराठी साहित्याला कसा प्रतिसाद मिळतो, असे त्यांनी आवर्जून विचारल्याचे गॅलरीचे संचालक रमेश राठिवडेकर यांनी सांगितले.
