डोंबिवलीतील खंबाळपाडा येथील केडीएमसीच्या बीएसयूपीच्या इमारतीत वायरची चोरी करण्यासाठी दोन तरुण गेले होते. मात्र पळून जाण्याच्या प्रयत्नात एकाचा जागीच मृत्यू झाला, तर दुसरा चोर जखमी झाला.
इमारतीत चोर शिरल्याचे सुरक्षारक्षकाच्या लक्षात आल्याने घाबरून इमारतीच्या पाइपवरून खाली उतरण्याचा प्रयत्न करताना दोन्ही चोर आठव्या मजल्यावरून खाली पडले. यात एकाच्या डोक्याला गंभीर दुखापत झाल्याने त्याचा जागीच मृत्यू झाला, तर दुसरा तरुण जखमी झाल्याची घटना सोमवारी रात्री घडली. मोहम्मद सलिम भाटकर असे मृत्यू झालेल्या तरुणाचे नाव असून तो सराईत गुन्हेगार होता. अरफाह पिंजारी असे जखमी झालेल्या तरुणाचे नाव आहे. टिळकनगर पोलिसांनी घटनास्थळी धाव घेत भाटकरचा मृतदेह शवविच्छेदनासाठी पाठवला.
महापालिकेने केंद्र आणि राज्य शासनाच्या माध्यमातून शहरी गरिबांसाठी बीएसयूपी योजनेंतर्गत डोंबिवली व खंबाळपाडा परिसरात इमारती उभारल्या आहेत. मात्र, अद्याप लाभार्थ्यांना सदनिकांचा ताबा देण्यात आलेला नाही. त्यामुळे चोरांनी या इमारतींमधील साहित्याची लूट चालवली आहे.