ठाण्यातील माजी नगरसेवक सुधाकर चव्हाण यांचे प्रदीर्घ आजारामुळे खाजगी रुग्णालयात उपचारादरम्यान निधन झाले. शनिवारी ७ मे रोजी दुपारी त्यांचे निधन झाले आहे. मृत्यू समयी त्यांचे वय ६५ होते. त्यांच्या पश्चात पत्नी सुलेखा आणि मुलगा प्रन्मय असा परिवार आहे. त्यांनी चार वेळा स्थायी समिती आणि एकदा परिवहन समितीचे सभापती पदही भुषविले होते.
ठाण्यातील नामांकित माजी नगरसेवक सुधाकर चव्हाण यांचे आज शनिवारी दुपारी प्रदीर्घ काळाने निधन झाले. त्यांच्या निधनानंतर त्यांच्या प्रभागात एकच शोककळा पसरली आहे. गेल्या एक महिन्यापासून त्यांच्यावर एका खाजगी रुग्णालयात उपचार सुरु होते. सुधाकर चव्हाण यांनी महापालिकेत आपले एक वेगळे स्थान निर्माण केले होते. प्रत्येक निवडणुकीत अपक्ष म्हणून निवडून येणे ही त्यांची खासियत होती. १९९२ ते २०१७ असे तब्बल २५ वर्षे म्हणजेच पाच टर्म ते महापालिकेत नगरसेवक म्हणून निवडून आले होते. तसेच अपक्ष म्हणून त्यांनी तिघांचे पॅनलही पालिकेवर निवडून आणले होते. मधल्या काळात त्यांनी मनसेत प्रवेश केला होता. त्यावेळेसही त्यांनी मनसेचे दोन नगरसेवक निवडून आणले होते.
रिक्षा चालक ते नगरसेवक असा त्यांचा मोठा प्रवास राहिला आहे. पालिकेत निवडून आल्यानंतर चार वेळा त्यांनी स्थायी समिती सभापत पद भुषविले होते. तर एकदा परिवहन समितीचे सभापतीपदही भुषविले होते. तसेच शिवाई विद्या प्रसारक मंडळ, डिस्ट्रीक लेव्हल जिमन्यास्टीक असोसिएशन, माजिवडा ट्रेव्हलर्स ग्रुप, शिवाई नगर कला केंद्र क्रिडा मंडळ, शिवाई नगर नवरात्र उत्सव मंडळ, म्हाडा वसाहत महा संघ, स्वामी विवेकानंद नगर ठाणे आदीचे देखील अध्यक्षपद भुषविले होते. तसेच ठाणे जिल्हा कब्बडी असोसिएशन, नवी मुंबई बॉडी बिल्डींग असोसिएशन, विजू नाटेकर रिक्षा टॅक्सी युनियन, रिक्षा टॅक्सी युनियन कोकण डिवीजन आदींचे उपाध्यक्ष पद भुषविले होते. तर सुलोचना ग्राम विकास प्रतिष्ठान ठाणे, यशोधन इंग्लिश मिडीयम स्कुल लोकमान्य नगर, स्टुडन्ट फ्युचर असोसिएशन, संस्कार प्रतिष्ठा ट्रस्ट, भक्त कल्याण गणपती मंदीर उपवन आदींचे त्यांनी प्रमुख सल्लागार पदही भुषविले होते. दरम्यान रविवारी सकाळी ११ वाजता मंत्रजली निवास येथून त्यांची अंत्ययांत्र निघणार असल्याचे त्यांच्या निकटवर्तीयांनी सांगितले.