अवैध मद्यनिर्मिती करण्यासाठी लागणाऱ्या बाटलीची बनावट झाकण बनवणाऱ्या कारखान्यावर ठाण्यातील राज्य उत्पादन शुल्क विभागाने छापेमारी करून तब्बल ४० लाखाहून अधिक मुद्देमाल जप्त केला आहे. या कारवाई दरम्यान राज्य उत्पादन शुल्क विभागाकडून ११ आरोपींना अटक करण्यात आली आहे. या छापेमारी दरम्यान राज्य उत्पादन शुल्क विभागाकडून आणखी दोन संलग्न कारखान्यांवर देखील कारवाई करण्यात आली असल्याची माहिती यावेळी देण्यात आली आहे.
ठाण्यातील वागळे इस्टेट परिसरात अवैध मद्य निर्मिती करण्याकरिता लागणाऱ्या बाटलीच्या बनावट झाकाणांचे उत्पादन केले जात असल्याची माहिती ठाणे राज्य उत्पादन शुल्क विभागाला गुप्त बातमीदाराकडून मिळाली होती. त्यानुसार राज्य उत्पादन शुल्क विभागाने धडक कारवाई करून या कारखान्यावर छापेमारी केली. छापेमारी दरम्यान राज्य उत्पादन शुल्क अधिकाऱ्यांना त्या ठिकाणी विविध कंपन्यांच्या मद्यच्या बाटलीचे बनावट झाकणाचे उत्पादन सुरु असल्याचे आढळून आले. हा संपूर्ण मुद्देमाल पोलिसांनी जप्त केला आहे. यावेळी राज्य उत्पादन शुल्क विभागाकडून मद्याच्या बाटलीची बनावट झाकण, हि झाकण तयार करण्यासाठी लागणाऱ्या ५ मोठ्या मशीन असा एकूण ४० लाख ५० हजार रुपयांचा मुद्देमाल जप्त केला आहे. या प्रकरणी पोलिसांनी अशाप्रकारे बनावट झाकण बनवणाऱ्या २ संलग्न कारखान्यांवर देखील छापेमारी केली आहे. राज्य उत्पादन शुल्क विभागाकडून या दरम्यान तब्बल ११ आरोपींना अटक करण्यात आली आहे. या आरोपींना न्यायालयात हजर केले असता न्यायलयाने ३ जणांना पोलीस कोठडी तर उर्वरित आरोपींना न्यायालयीन कोठडी सुनावली आहे.काही दिवसांपूर्वी राज्य उत्पादन शुल्क विभागाकडून मद्याच्या विविध कंपन्यांच्या रिकाम्या बाटल्यांवर कारवाई करण्यात आली होती. या रिकाम्या बाटल्या अवैध मद्य विक्रीसाठी वापरण्यासाठी उपयोगात आणणार असल्याचा अंदाज राज्य उत्पादन शुल्क विभागाकडून वर्तवण्यात आला होता. उत्तर प्रदेश येथील कानपूर परिसरात अवैध दारू तयार करण्यात येत असून त्यासाठी लागणाऱ्या रिकाम्या बाटल्या व त्यासाठी लागणारी झाकण तयार केली जात असल्याचा प्राथमिक अंदाज राज्य उत्पादन शुल्क विभागाकडून व्यक्त करण्यात आला आहे. तसेच या अवैध मद्य विक्री प्रकरणी मोठी टोळी सक्रीय असल्याचा संशय व्यक्त केला असून त्या अनुषंगे तापस सुरु असल्याची माहिती उत्पादन शुल्क ठाणे विभागाचे अधीक्षक निलेश सांगडे यांनी दिली आहे.