शनिवारी रात्री साडेदहा वाजेच्या सुमारास वडिलांसोबत घराबाहेर शतपावली झाल्यावर घरात जाण्यासाठी गेलेली दहावर्षीय चिमुकली अचानक बेपत्ता झाली. परिसरातील रहिवाशांसह स्थानिक पोलिस आणि श्वान पथकाने तिचा शोध घेतला. मध्यरात्री एक वाजेच्या सुमारास घरापासून एक किलोमीटर अंतराजवळ ही चिमुकली आढळली. रविवारी दुपारी या प्रकरणी चौकशी केल्यावर तिच्यावर अत्याचार झाल्याचा संशय दाटला. त्यानुसार उपनगर पोलिसांनी दोन संशयितांची चौकशी केली. रात्री उशिरापर्यंत ‘पोक्सो’अंतर्गत गुन्हा दाखल करण्याची प्रक्रिया सुरू होती.
उपनगर येथील भीमनगर भागातील एका इमारतीत राहणारे कुटुंबीय शनिवारी रात्री दहा वाजता शतपावली करण्यासाठी घराबाहेर निघाले. घरच्या श्वानाला फिरविल्यावर चिमुकली घराकडे गेली. तिचे वडील इमारतीबाहेर चालत होते. काही वेळाने वडील घरात परतल्यावर त्यांच्या पत्नीने मुलीबद्दल विचारले, तर ती केव्हाच घरात आल्याचे तिच्या वडिलांनी सांगितले. मात्र, मुलगी घरात नसल्याचे समजल्यावर त्यांनी इमारतीनजीक शोध घेण्यास सुरुवात केली. चिमुकली बेपत्ता झाल्याचे वृत्त परिसरात समजताच नागरिक एकत्र आले. उपनगर पोलिसांचे स्थानिक गुन्हे शोध पथक घटनास्थळी दाखल झाले. त्यांनीही चिमुकलीचा शोध घेतला. घराजवळच्या एका मोकळ्या जागेत मुलगी घाबरलेल्या अवस्थेत दिसली. घरी आणले, तरी ती बोलण्याच्या मनस्थितीत नव्हती. या प्रकरणी उपायुक्त विजय खरात, सहायक आयुक्त डॉ. सिद्धेश्वर धुमाळ यांच्यासह उपनगरचे वरिष्ठ पोलिस निरीक्षक माईनकर यांच्या मार्गदर्शनानुसार तपास सुरू आहे.