बॉलिवूड अभिनेत्री रविना टंडन चे वडील रवी टंडन यांचे शुक्रवार ११ फेब्रुवारी रोजी निधन झाले. रवीनाने सोशल मीडियावर पोस्ट करत वडिलांच्या निधनाची बातमी दिली. आपल्यावर कोसळलेल्या दुःखानंतरही अभिनेत्रीने मुलगी असण्याची जबाबदारी पार पाडत वडिलांवर अंत्यसंस्कार केले. त्याचे काही फोटो सोशल मीडियावर व्हायरल झाले आहेत.
सोशल मीडियावर व्हायरल झालेल्या फोटोंमध्ये रविना तिच्या वडिलांचे पार्थिव अॅम्ब्युलन्समधून स्मशानात अंत्यविधीसाठी घेऊन जाताना दिसत आहे. वडिलांच्या वियोगाने दुःखात बुडालेल्या रविनाने त्यांच्या पार्थिवाला मुखाग्नी देत अंत्यसंस्कार केले. यावेळी रविनाबरोबर तिचे कुटुंबातील सदस्य तसेच मित्रमंडळी आणि काही कलाकारही उपस्थित होते.
रविनाच्या वडिलांच्या अंत्यविधीवेळी तिच्या कुटुंबातील सदस्यांबरोबरच कलाकार मंडळीही सहभागी झाले होते. त्यामध्ये सुचित्रा पिल्लई, फराह खान, रिद्धिमा पंडित उपस्थित होती.
दरम्यान,शुक्रवारी सकाळी रविनाने तिच्या सोशल मीडियावर वडिलांबरोबरचे काही फोटो शेअर केले होते. हे फोटो शेअर करत तिने लिहिले होते की, ‘तुम्ही कायम माझ्यासोबतच असाल. मी देखील तुमच्यासारखीच असेन. मी तुम्हाला कुठेही जाऊ देणार नाही.. लव यू पापा.’रविनाचे वडील रवी टंडन हे देखील प्रख्यात सिनेनिर्माता आणि दिग्दर्शक होते. रविना तिच्या वडिलांची खूप लाडकी होती. रविनाने १९९१ मध्ये पत्थर के फूल या सिनेमातून अभिनय क्षेत्रात पदार्पण केले. त्यानंतर तिने मोहरा, दिलवाले, लाडला, अंदाज अपना अपना यांसारख्या अनेक सुपरहिट सिनेमांत काम केले होते.