डॉक्टरांनी दिलेल्या औषधानंतर काही तासांतच दीड वर्षांच्या चिमुकलीचा मृत्यू झाल्यानंतर डॉक्टरांनी चुकीची औषधे दिल्याने आपली मुलगी दगावल्याचा आरोप करत पालकांनी न्यायालयाचे दरवाजे ठोठावले होते. या प्रकरणातील आरोपी डॉक्टरांना न्यायालयाने अंतरिम जामीन दिला असला तरी मुलीच्या मृत्यूच्या कारणाचा शोध घेण्यासाठी पुरलेला मृतदेह बाहेर काढून त्याची उत्तरीय तपासणी करण्याचे निर्देश दिले होते. न्यायालयाच्या निर्देशानुसार सहा महिन्यांपूर्वी पुरलेल्या मृतदेहाचे अवशेष बाहेर काढून ते तपासणीसाठी फॉरेन्सिक लॅबमध्ये धाडण्यात आले आहेत. येणाऱ्या अहवालातून या मुलीचा मृत्यू नेमका कशामुळे झाला, याचा उलगडा होऊ शकणार आहे.
मात्र, मुलीला न्याय मिळवून देण्यासाठी या गरीब दाम्पत्याला अॅड. सत्येंद्र दुबे यांच्या मदतीमुळे बळ मिळाले. त्यांनी कल्याण न्यायालयात संबधित डॉक्टरविरोधात याचिका दाखल केली होती. ही याचिका मागे घेण्यासाठी वडील आणि आईला धमक्या देत त्यांच्यावर वेगवेगळ्या प्रकारे दबाव आणण्यात आला. मात्र त्यांनी हार मानली नाही. शवविच्छेदन अहवाल नसल्यामुळे त्यांनी डॉक्टरविरोधात भक्कम पुरावे गोळा केले. या पुराव्याच्या आधारे न्यायालयाने या दोन्ही आरोपींना अटक करण्याचे आदेश दिले होते. चौकशी पूर्ण झाल्यानंतर न्यायालयाने या दोघाची अंतरिम जामिनावर मुक्तता केली असली तरी मुलीचा मृत्यू नेमका कशामुळे झाला, याचा शोध घेण्याचे आदेश दिले आहेत.
या आदेशानुसार नायब तहसीलदार सुषमा बांगर यांच्या निरीक्षणाखाली तपास अधिकाऱ्यांनी दफन केलेला मृतदेह पुन्हा खोदून काढला मात्र सहा महिन्यानंतर या मृतदेहाची फक्त हाडे शिल्लक असल्याने ती गोळा करून ती तपासणीसाठी फोरेन्सिक लॅब मध्ये धाडण्यात आली आहेत. या तपासणीच्या अहवालातून मुलीचा नेमका मृत्यू कशामुळे झाला, याचा उलगडा होऊ शकेल, अशी आशा तिच्या पालकांना वाटत आहे. या डॉक्टरकडून इतरांच्या जीवाशी खेळ होऊ नये यासाठी त्यांना जास्तीत जास्त शिक्षा व्हावी, अशी मागणी मुलीच्या पित्याने केली आहे.