ठाण्यातील वागळे इस्टेट परिसरात क्रिकेट सामन्यांवर सट्टा लावणाऱ्या दोन बुक्कींना मालमत्ता गुन्हे शाखेच्या पथकाने अटक केली आहे. पाकिस्तान येथे सुरु असलेल्या सुपर लीग २०२२ च्या टी-२० सामना सुरु असताना ही कारवाई करण्यात आली. या प्रकरणी धीरेन ठक्कर आणि भव्या हितेश वीरा या दोघांना पोलिसांनी अटक केली आहे. यातील धीरेन ठक्कर याच्याविरोधात या आधी देखील अशाच प्रकारचा गुन्हा दाखल असल्याची माहिती समोर आली आहे.
ठाणे येथील वागले इस्टेट येथील रोड नंबर १६ परिसरातील नटवर हॉटेलमध्ये दोन बुक्की क्रिकेटवर सट्टा लावत असल्याची खात्रीशीर बातमी गुप्त माहितीदारांकडून मालमत्ता गुन्हे शाखेच्या पथकाला मिळाली होती. त्या नुसार मालमत्ता गुन्हे शाखेच्या पथकाने त्या ठिकाणी छापेमारी करून त्या दोन जणांना ताब्यात घेतले. छापेमारी दरम्यान हे दोन्ही बुक्की पाकिस्तान मध्ये सुरु असलेल्या पाकिस्तान लीग २०२२ च्या टी २० सामन्यावर सट्टा लावत होते. सदरचा सामना हा कराची किंग्ज विरुद्ध पेशावर झल्मी या संघांमध्ये सुरु होता. या सामन्यावेळी दोन्ही बुक्कीकडून ऑनलाईन ट्रांजेक्शन द्वारे व्यवहार करत होते.
ताब्यात घेतलेल्या धीरेन ठक्कर आणि भव्या हितेश वीरा त्या दोघांनी आपण क्रिकेटवर सट्टा लावत असल्याची कबुली दिल्यानंतर त्यांच्या विरोधात ४२०, ३४ प्रमाणे जुगार प्रतिबंध अधिनियम कायद्या अंतर्गत ठाण्यातील वागळे इस्टेट पोलीस ठाण्यात गुन्हा दाखल करून अटक करण्यात आली आहे. त्या दोघांकडून मालमत्ता गुन्हे शाखेकडून २० हजार रुपये किमतीचे मोबाईल फोन जप्त केले आहेत. या दोन्ही जणांना न्यायालयात हजर केले असता न्यायालयाने या दोन्ही बुक्कींना १० फेब्रुवारी पर्यंत पोलीस कोठडी सुनावण्यात आली आहे. या प्रकणात आणखीन काही आरोपी असण्याची शक्यता पोलिसांकडून वर्तवण्यात आली असून पुढील तपास सुरु आहे.