ठाण्यातील घोडबंदर परिसरात कोकेन आणि मोफेड्रोन पावडर (एम.डी.) ड्रग्जची विक्री करण्यासाठी आलेल्या एका नायजेरियन व्यक्तीला ठाण्यातील कासारवडवली पोलिसांनी अटक केली आहे. या नायजेरियन व्यक्तीकडून पोलिसांनी १ कोटीहून अधिक किंमतीचे अंमली पदार्थ आणि इतर मुद्देमाल जप्त केले आहे. सदरचे अंमली पदार्थ त्याने आफ्रिकेतून आणला असल्याची प्राथमिक माहिती तपासात उघड झालेली आहे. याबाबत पोलीस अधिक तपास पोलीस करीत आहेत.
ठाण्यातील घोडबंदर रोडवरील आनंद नगर येथे एक व्यक्ती अंमली पदार्थांची विक्री करण्यासाठी येणार असल्याची माहिती ठाणे गुन्हे शाखेच्या, वागळे घटक- ५ चे वरीष्ठ पोलीस निरीक्षक विकास घोडके यांना मिळाली होती. या मिळालेल्या माहितीनुसार गुन्हे शाखेने घोडबंदर रोडवरील कासारवडवली परिसरात सापळा रचला. यावेळी पोलिसांनी संशयास्पद वावरत असलेल्या एका नायजेरियन व्यक्तीला ताब्यात घेतले त्याची अंगझडती घेतली असता त्याच्याकडून पोलिसांना कोकेन आणि मेफेड्रॉन (एम.डी.) पावडर सापडली असता पोलिसांनी त्याच्याविरुद्ध ठाण्यातील कासारवडवली पोलीस ठाण्यात एन.डी.पी.एस. अधिनियमान्वये गुन्हा दाखल केला. डिक्सन चिडीबेरे इझे (३० वर्ष) असे या नायजेरियन व्यक्तीचे नाव असून तो मुंबईच्या चांदिवली मधील रहिवाशी आहे. त्याच्याकडून पोलिसांनी २७४ ग्रॅम कोकेन व ६० ग्रॅम मेफेड्रॉन (एम.डी.) पावडर, रिपब्लिक ऑफ नायजेरियाचा पासपोर्ट, १ कार, ६ मोबाईल फोन्स, एक इलेक्ट्रॉनीक वजन काटा असा एकुण १ कोटी १७ लाख ३८ हजार ३६० रुपये किंमतीचा मुद्देमाल जप्त करण्यात आला आहे. जप्त केलेल्या २७४ ग्रॅम कोकेन व ६० ग्रॅम मेफेड्रॉन (एम.डी.) पावडरची भारतीय बाजारात १ करोड १२ लाख रुपये इतकी किंमत आहे.
आरोपी डिक्सन चिडीबेरे इझे या नायजेरियन व्यक्तीने आफ्रिकेतून ड्रग्जचा साठा आणल्याचा अंदाज आहे. त्याने हे ड्रग्ज ठाणे, मुंबई, नवी मुंबईसारख्या बऱ्याच शहरांमधील लोकांना विकले असल्याचे प्राथमिक तपासात समोर आले आहे. पोलिसांकडून सध्या पुढील तपास सुरु आहे. या नायजेरियन व्यक्तीला पोलिसांनी न्यायालयात हजर केले असता न्यायालयाने त्याला १ फेब्रुवारी पर्यंत पोलीस कोठडी सुनावली आहे. या डिक्सन चिडीबेरे इझे याच्याविरुद्ध मुंबई येथे देखील असाच एक गुन्हा दाखल असून तो जामिनावर बाहेर आला होता. त्याने हे अंमली पदार्थ कुणाला विक्री करण्यासाठी आणले होते? त्याने हे कोणाला विक्री केले आहेत? या प्रकरणात कुठली मोठी टोळी सक्रीय आहे का? याचा तपास पोलीस करत असल्याचे ठाणे गुन्हे शाखेचे अतिरिक्त पोलीस आयुक्त अशोक मोराळे यांनी सांगितले.