चार वर्षे ‘रिलेशनशिप’मध्ये राहून तरुणीने तिच्या माजी प्रियकरावर अत्याचाराचा आरोप केला. मात्र, ‘चार वर्षांच्या कालावधीसाठी तरुणीने लैंगिक संबंधांस संमती देणे हे केवळ लग्नाच्या आश्वासनातून घडले, असे म्हणता येऊ शकत नाही’, असे निरीक्षण नोंदवित उच्च न्यायालयाचे न्यायमूर्ती सुरेंद्र तावडे यांनी आरोपीचा अटकपूर्व जामीन मंजूर केला.
रमेश आणि सविता (नावे बदललेली) हे दोघेही यवतमाळ जिल्ह्यातील रहिवासी आहेत. त्यांची जुनी ओळख होती. २०१६पासून त्यांच्यात प्रेमसंबंध होते. पुढे त्यांच्यात लैंगिक संबंध प्रस्थापित झाल्याचे या तरुणीने तक्रारीत नमूद केले आहे. लग्नाचे आश्वासन देऊन लैंगिक संबंध प्रस्थापित करीत ऐनवेळी लग्नाला नकार दिला व आपली फसवणूक केली, असा आरोप सविताने रमेशवर केला आहे. याप्रकरणी रमेशने त्याचे वकील राहिल मिर्झा यांच्यामार्फत उच्च न्यायालयात अटकपूर्व जामिनासाठी अर्ज केला. सविता आणि रमेश यांच्यात चार वर्षे प्रेमसंबंध होते. ते दोघांच्याही घरी ठाऊक होते. रमेशच्या कुटुंबीयांनी लग्नासाठी तगादा लावला होता. रमेशने सविताच्या कुटुंबीयांना लग्नाच्या बोलणीसाठी आमंत्रित केले होते. तिचे कुटुंबीय व नातेवाईक रमेशच्या घरीही गेले होते. मात्र, सविताच्याच वडिलांनी लग्न ठरविण्यास नकार दिल्याचे तिच्या तक्रारीत नमूद आहे. तसेच चार वर्षांच्या नात्यात लैंगिक संबंधास सविताने संमती दिली होती. अशात ही संमती केवळ लग्नाच्या आश्वासनावर दिली होती, असे म्हणता येणार नाही, असा निर्वाळा देत न्यायालयाने रमेशचा अटकपूर्व जामीन मान्य केला.