दारूच्या नशेत मारहाण करणाऱ्या पतीचा एका महिलेनं आपल्या बहिणीच्या नवऱ्याच्या मदतीने खून केल्याचा प्रकार मुंढवा परिसरात समोर आला आहे. या प्रकरणी दोघांना अटक करण्यात आली आहे.
कप्तान सिंग नायक (राहणार केशवनगर मुंढवा) असे खून झालेल्या व्यक्तीचे नाव आहे. कप्तान सिंह हा पत्नी अंजलीला दारू पिऊन सतत मारहाण करत असे. या कारणावरून पत्नी अंजलीने कप्तानच्या साडूच्या मदतीने त्याचा गळा आवळून खून केला. रविवारी सायंकाळी ही घटना घडली. या प्रकरणी कप्तान सिंग याची पत्नी अंजली आणि साडू गजेंद्र यांच्यावर खुनाचा गुन्हा दाखल करत त्यांना अटक करण्यात आली आहे. पोलीस अधिक तपास करत आहेत.
संशयावरून पत्नीच्या खुनाचा प्रयत्न
मोबाइल ‘ब्लॉक’ केल्याचा राग मनात धरून आणि पत्नीवरील संशयामुळं एका सराईत गुन्हेगाराने त्याच्या पत्नीच्या पोटात चाकू भोसकून खून करण्याचा प्रयत्न केला. नरवीर तानाजी मालुसरे रस्ता (सिंहगड रस्ता) धायरी येथे ही घटना घडली. महिलेचा भाऊ मदतीसाठी आला, तेव्हा त्याच्यावरही आरोपीने चाकूने वार केले. या प्रकारानंतर गुन्हेगार पती पसार झाला. या प्रकरणी २२ वर्षीय पत्नीने सिंहगड रोड पोलिस ठाण्यात तक्रार दिली आहे. त्यावरून सचिन ज्ञानोबा आमले (वय ३०, रा. घोटवडे गाव, मुळशी) असे गुन्हा दाखल करण्यात आलेल्याचे नाव आहे.