गुटखा आणि तंबाखूची बेकायदा वाहतूक करणाऱ्याला गुन्हे शाखेच्या पोलिसांनी (युनिट ६) अटक केली. त्याच्याकडून तीन हजार ८६१ किलो विमल पानमसाला आणि तंबाखूची २५ पोती असा एकूण ५६ लाखांचा मुद्देमाल जप्त केला.
अन्न सुरक्षा अधिकारी गणपत कोकणे यांनी लोणी काळभोर पोलिस ठाण्यात तक्रार दिली आहे. त्यावरून प्रवीण दुर्योधन जाधव (वय २६, सातारा), ट्रकमालक सोमनाथ भीमराव जाधव (वय ३२, सातारा) आणि सुजित खिवंसरा यांच्यावर गुन्हा दाखल करण्यात आला आहे.
पोलिसांनी दिलेल्या माहितीनुसार, राज्यात गुटखा किंवा गुटखा पानमसाला मिश्रित सुगंधित सुपारी आणि तंबाखूचे उत्पादन, साठवणूक, वितरण, वाहतूक आणि विक्री यावर बंदी आहे. मात्र, बंदी असतानाही आरोपींना तीन हजार ८६१ किलो विमल पानमसाला आणि तंबाखूच्या २५ पोती, असा ५६ लाख ४८ हजार रुपये किमतीचा गुटख्याची वाहतूक करताना गुन्हे शाखेच्या पथकाने पकडले. पुणे-सोलापूर महामार्गावर थेऊर फाटा येथे २१ जानेवारीला रात्री साडेदहाच्या सुमारास ही कारवाई करण्यात आली. आरोपींनी गुटखा वाहतुकीसाठी वापरलेला ट्रकदेखील पोलिसांनी ताब्यात घेतला.