बदलापूरजवळच्या मुळगावमध्ये खंडोबाच्या लग्नासाठी शेकडोंची गर्दी जमल्याचं समोर आले. बदलापूर जवळच्या मुळगावमध्ये डोंगरावर खंडोबाचं मंदिर आहे. या मंदिरात सोमवारी संध्याकाळी ५ वाजता खंडोबाच लग्नसोहळा आयोजित करण्यात आला होता. सध्या लागू असलेल्या करोनाच्या नियमांनुसार या सोहळ्याला मोजके ग्रामस्थ किंवा पुजारी उपस्थित असणं अपेक्षित होतं. मात्र प्रत्यक्षात या सोहळ्यासाठी डोंगरावर शेकडोंची गर्दी जमली. इतकंच नव्हे, तर बेंजो लावून भंडाऱ्याची उधळण करत नाचत असल्याचे दिसतंय. या गर्दीत सोशल डिस्टनसिंग तर दूरच, पण कुणीही साधा मास्क सुद्धा घातलेला नव्हता. आधीच करोनाच्या तिसऱ्या लाटेच्या पार्श्वभूमीवर राज्यात जमावबंदी लागू करण्यात आली आहे. धार्मिक कार्यक्रमांसाठी फक्त ५० लोकांना परवानगी देण्यात आलीये. खंडोबाच्या मंदिरात शेकडोंची गर्दी जमल्यानं कायदा सुव्यवस्थेवरच प्रश्नचिन्ह निर्माण झालं आहे. यातून आता करोनाचा उद्रेक झाला, तर जबाबदारी कुणाची? असा प्रश्न निर्माण झाला आहे.
