मकर संक्रांतीच्या निमित्ताने आकाश रंगबेरंगी पतंगांनी भरून गेले आहे. यासाठी बाजारातही आकर्षक पतंग दाखल झाले आहेत. समर्थनगर येथील रिक्षाचालक हेमंत नाखरे यांनी जुन्या छत्र्यांपासून शंभर पतंग तयार केले आहेत. त्यामुळे बाजारात अनेक प्रकारचे आकर्षक पतंग असतानाही जुन्या छत्र्यांपासून तयार केलेले पतंग नाशिककरांचे लक्ष वेधून घेत आहेत.
नाखरे यांनी सात फुटांच्या पतंगावर मनोगत लिहिले आहे. या माध्यमातून ते नागरिकांना काळजी घेण्याचा सल्ला देत आहेत. घराबाहेर पडताना मास्क लावणे, सोशल डिस्टन्सिंग, समतोल आहार, व्यायामाच्या महत्त्वासह वैयक्तिक स्वच्छतेची कास धरावी, असे आवाहन केले आहे. ‘अनेक अडचणींवर मात करीत दोन वर्षांनी आपण एकत्र आलो आहोत. राज्यात ओमायक्रॉनचे संकट वाढत आहे. त्यामुळे स्वत:सह आप्तेष्टांचीही काळजी घ्या’, असे आवाहन त्यांनी केले आहे.
नाशिककरांना करोनाच्या जनजागृतीसह पर्यावरण बचतीचा संदेश मिळावा यासाठी हे पतंग तयार करण्यात आले आहेत. नाशिकसह हरसूल आणि त्र्यंबकेश्वरमध्येही हे पतंग उडवत आहेत, जेणेकरुन नागरिकांमध्ये जनजागृती होईल. गेल्या पंधरा दिवसांपासून छत्र्यांपासून शंभर पतंग बनविण्यात आले आहेत.
– हेमंत नाखरे