नवीन जालन्यात गॅस सिलेंडरचा पहाटे मोठा भीषण स्फोट झाल्याची घटना घडली आहे. या वेळी आग विझवण्यासाठी गेलेला एक पोलीस गंभीर जखमी झाल्याची प्राथमिक माहिती समोर येत आहे. शिवाजी महाराज पुतळा परिसरातील फेरीवाल्यांच्या टपरीमध्ये आग लागून सिलेंडरचा स्फोट झाला आहे.शनिवारी, पहाटे साडेतीन वाजेच्या सुमारास छत्रपती शिवाजी महाराज पुतळा परिसरातील भेळपुरी विक्रेत्याच्या टपरीला अचानक आग लागली होती. आगीची माहिती कळताच रात्र गस्तीवर असलेले सदर बाजार पोलिस ठाण्याचे पोलीस हवालदार महेश्वर सोनटक्के आणि पोलीस कॉन्स्टेबल जाधव हे जीपसह मदतीला धावले. त्यांनी तातडीने अग्निशमन दलाला फोन करून कळविले. मात्र आग अधिक पसरू नये यासाठी त्यांनी स्वतः आग विझविण्यास सुरुवात केली.आग विझवत असतानाच टपरीत असलेल्या सिलेंडरचा अचानक मोठा स्फोट झाला. या स्फोटांमध्ये पोलीस हवालदार सोनटक्के हे गंभीर जखमी झाले आहेत. त्यांना जालना येथे उपचार करून नंतर औरंगाबाद येथे हलविण्यात आले आहे. हा स्फोट एवढा भीषण होता की, खूप मोठा आवाज होऊन टपरीचा पूर्णता चुराडा होऊन सुट्टे भाग दूरवर सर्वत्र पसरले आहेत.