कन्नड तालुक्यातील बरकतपूर येथे एका ५० वर्षीय नराधमाने ५ वर्षीय चिमुकलीला पैशाचे आमिष दाखवून घरात नेत तिचे कपडे काढत अश्लील चाळे केल्याची संतापजनक घटना समोर आली आहे. याप्रकरणी आई- वडिलांच्या तक्रारीवरून या व्यक्तीविरोधात पोक्सो कायद्यांतर्गत विनयभंगाचा गुन्हा दाखल करण्यात आला असून आरोपीला अटक सुद्धा करण्यात आली आहे.
पीडित पाच वर्षीय चिमुकलीची आई आजारी असल्याने तिच्या वडिलांनी तिला जवळ असलेल्या गावातील दवाखान्यात घेऊन गेले होते. पण दवाखान्यात जाण्यापूर्वी त्यांनी आपल्या पाच वर्षीय मुलीला शेजारी राहणाऱ्या आत्याच्या घरी सोडले. दवाखान्यातील काम झाल्याने मुलीचे आई-वडील सायंकाळी ५ वाजेच्या सुमारास घरी आले असता, तेव्हा त्यांना मुलगी आत्याच्या घरी आढळली नाही.
मुलगी अत्याच्या घरात नसल्याने शोधाशोध करत असतानाच चिमुकली शेजारी राहणाऱ्या आरोपी वामन साहेबराव सुलताने (५०, रा. लोणवाडी, ता. सिल्लोड ह.मु बरकतपूर) याच्या घरातून विना कपड्याची रडत पळत घराबाहेर आली. त्यावेळी आई-वडिलांनी तिला विचारल्यानंतर तिने घडलेला सर्व प्रकार सांगितला. आरोपीने मुलीचे आई-वडील घरी नसल्याची संधी साधून तिला पैशांचे आमिष दाखवून घरात नेले. तिचे कपडे काढून अश्लील चाळे सुरू केल्यानंतर भेदरलेली मुलगी रडतच घराबाहेर पळत आली. याप्रकरणी पिशोर पोलिसात गुन्हा दाखल करण्यात आला आहे.