मुंबई पालिकेकडून १५ ते १८ वर्षे वयोगटातील मुलांच्या लसीकरणाची मोहीम ३ जानेवारीपासून राबविली जाणार आहे. त्यासाठी मुंबईतील ९ जम्बो करोना केंद्रात लसीकरणाची सुविधा पुरविण्यात आली आहे. त्यासाठी २००७ मध्ये किंवा त्यापूर्वी जन्म झालेल्या मुलांना याचा लाभ घेता येईल. त्यासाठी शनिवार, १ जानेवारीपासून ऑनलाइन नाव नोंदणीस प्रारंभ होत आहे.
मुंबई पालिकेने मुलांच्या लसीकरणासाठी मार्गदर्शक सूचना दिल्या आहेत. त्यात, २००७ वा त्यापूर्वी जन्म वर्ष असलेली मुले पात्र असतील. त्यासाठी कोविन अॅपवर स्वतःच्या मोबाइल क्रमाकाने लसीकरणासाठी नोंदणी करता येईल. ही ऑनलाइन सुविधा शनिवार, १ जानेवारी पासून सुरू होईल. त्याचप्रमाणे, लसीकरण केंद्राच्या ठिकाणी जाऊन नोंदणी करण्याचीही सुविधा देण्यात आली आहे. मुलांना कोवॅक्सिन लस देण्यात येणार असल्याचे पालिकेने स्पष्ट केले आहे.
लसीकरण केंद्रांची सुविधा
आर. सी. भायखळा करोना केंद्र
सोमय्या जम्बो करोना केंद्र, सायन
एनएससीआय करोना केंद्र, वरळी
बीकेसी जम्बो केंद्र, वांद्रे
नेस्को, गोरेगाव केंद्र
मालाड जम्बो केंद्र
दहिसर जम्बो केंद्र
क्रॉम्प्टन अँड ग्रीव्हज, करोना केंद्र, भांडुप
आर. सी. मुलुंड जम्बो करोना केंद्र
८६ टक्के नागरिकांनी घेतली दुसरी मात्रा
मुंबई पालिकेस आतापर्यंत १ कोटी २० लाख ६५ हजार ८३० एवढ्या लशींच्या मात्रा प्राप्त झाल्या आहेत. त्यात, पहिली मात्रा ९९ लाख २४ हजार ७२१ पात्र व्यक्तींना आणि दुसरी मात्रा ७९ लाख १७ हजार ७०३ व्यक्तींना देण्यात आली आहे. पहिली मात्रा घेतलेल्या व्यक्तींचे प्रमाण १०७ टक्केआणि दुसरी मात्रा घेतलेल्या व्यक्तींचे प्रमाण ८६ टक्के इतके आहे.
४५१ लसीकरण केंद्रे
केंद्र सरकारच्या निर्देशानुसार मुंबईत १६ जानेवारी २०२१ पासून लसीकरण सुरू झाले आहे. सुरुवातीला फ्रँटलाइन कर्मचाऱ्यांसह १ मे २०२१ पासून १८ वर्षांवरील व्यक्तींचे लसीकरण केले जात आहे. त्यासाठी, सध्या पालिका, सरकारी रुग्णालयात ३०२, खाजगी रुग्णालयात १४९ असे मिळून ४५१ लसीकरण केंद्रे सुरू केली आहेत.