बॉक्स ऑफिसनं पुन्हा एकदा गरुड झेप घेतली आहे. सिनेमांनी आता १०० कोटींचा आकडा गाठायला सुरुवात केलीय. भारतीय सिनेविश्व पुन्हा एकदा बहरलेलं दिसतंय. सिनेनिर्माते, वितरक आणि सिनेमागृह व्यावसायिकांनी आता सुटकेचा नि:श्वास सोडलाय. गेल्या १९ महिन्यांत सिनेविश्वानं अनेक चढ-उतार अनुभवले. पण, आता ‘थांबायचं नाय गड्या…’ असं म्हणत बॉलिवूडसह प्रादेशिक सिनेविश्व नव्या उत्साहानं कामाला लागलं आहे. गेल्या आठवड्यात प्रदर्शित झालेल्या सिनेमांनी कोट्यवधींचा गल्ला आपल्या नावी केलाय.
मार्च २०२० मध्ये प्रदर्शनासाठी तयार असलेला अक्षयकुमारचा ‘सूर्यवंशी’ हा सिनेमा १९ महिन्यांच्या प्रदीर्घ प्रतीक्षेनंतर गेल्या आठवड्यात प्रदर्शित झाला. आपला सिनेमा ओटीटीवर (ओव्हर द टॉप) नव्हे तर केवळ सिनेमागृहातच प्रदर्शित करायचा; असा अक्षय आणि दिग्दर्शक रोहित शेट्टीचा अट्टहास होता. पण, त्यामुळेच या सिनेमाला आज १०० कोटी क्लबच्या घरात पोहोचवलं आहे. ज्या क्षणाची केवळ बॉलिवूडच नव्हे तर संपूर्ण भारतीय सिनेव्यवसाय प्रतीक्षा करत होता; ते लॉकडाउननंतर पहिल्यांदा घडलं आहे. बॉक्स ऑफिसवरील कोट्यवधी रुपयांची घोडदौड अशीच सुरू राहावी; अशी अपेक्षा सिनेमागृह व्यावसायिक आणि सिनेनिर्माते करत आहेत.
बॉलिवूडचा केंद्रबिंदू असलेल्या मुंबईत अर्थात महाराष्ट्रात सिनेमागृह केवळ ५० टक्के क्षमतेनं सध्या कार्यान्वित आहेत. उर्वरित बहुतांश राज्यात ती पूर्ण क्षमतेनं सुरू आहेत. त्यामुळे ‘सूर्यवंशी’ हा सिनेमा बॉक्स ऑफिसवर उत्तम कामगिरी करेल का? याविषयी सिनेव्यावसायिकांमध्ये शंका होती. परंतु, ‘सूर्यवंशी’नं पहिल्याच दिवशी २६ कोटींचं बॉक्स ऑफिस कलेक्शन केलं. तसंच रजनीकांत यांच्या ‘अन्नाथे’ या सिनेमानं ३० कोटींची कमाई केली. हॉलिवूडच्या ‘इटर्नल्स’नं भारतात पहिल्या दिवशी ७ कोटींची कमाई केली. विशेष म्हणजे पहिल्या दिवसाची भारतीय बॉक्स ऑफिसची कमाई ६० कोटींच्या घरात आहेत. त्यामुळे आगामी महिन्यांत प्रदर्शित होणाऱ्या सिनेमांच्या निर्मात्यांच्या आशा प्रफुल्लित झाल्या आहेत. भारतीय सिनेव्यवसाय आणि सिनेप्रदर्शनाला ही बाब उभारी देणारी असल्याचं जाणकार सांगतात.
* पहिल्या तीन दिवसांचा बॉक्स ऑफिस कलेक्शन :
सूर्यवंशी
भारतात : ७७. ०८ कोटी
जगभरात : ११७.१६ कोटी
अन्नाथे
तामिळनाडू : ८३.७३ कोटी
जगभरात : १४६.५३ कोटी
इटर्नल्स
भारतात : २२.८० कोटी
प्रेक्षकांसाठी मनोरंजनाची पर्वणी
येत्या दिवसांत प्रेक्षकांसाठी सिनेगृहात मनोरंजनाची पर्वणी असणार आहे. विषयांचं वैविध्य तर सिनेमांमध्ये आहेच; पण त्याचबरोबर स्टार कलाकारांचे सिनेमेही या शर्यतीत आहेत. बॉक्स ऑफिसच्या या धमाकेदार टक्करमध्ये तिन्ही खान नसले तरी प्रेक्षकांना मात्र आगामी सिनेमांकडून खूप अपेक्षा आहे. ‘सत्यमेव जयते २’, ‘गंगुबाई काठियावाडी’, ‘आरआरआर’, ‘अंतिम’, ‘मेजर’, ‘राधे श्याम’, ‘केजीएफ २’, ‘फायटर’, ‘पुष्पा’, ‘बंटी और बबली २’, ‘तडप’, ‘चंदीगढ करे आशिकी’, ‘८३’, ‘जर्सी’ आदी सिनेमे प्रदर्शनाच्या मार्गावर आहेत. तसंच मराठीत ‘झिम्मा’, ‘जयंती’, ‘गोदावरी’, ‘डार्लिंग’, ‘फ्री हिट दणका’ या मराठी सिनेमांचं प्रदर्शनही ठरलं आहे.
हाऊसफुल्लचा बोर्ड लागला
‘सूर्यवंशी’, ‘इंटर्नल्स’, ‘अन्नाथे’ या तिन्ही सिनेमांना हाऊसफुल्लचा बोर्ड लागला. ही भारतीय सिनेप्रदर्शन व्यवसायासाठी चांगली सुरुवात आहे. गेल्या दीड वर्षांपासून सिनेमागृह अंधारात होता. मध्यंतरीच्या महिन्यांत काही सिनेमे प्रदर्शित झाले होते. परंतु, ‘सूर्यवंशी’, ‘अन्नाथे’ या सिनेमांमुळे हाऊसफुल्लचा बोर्ड पुन्हा एकदा सिनेमागृहांवर लागला. मोठ्या पडद्याची जादू कधीही कमी होणार नाही. प्रेक्षक सिनेमा पाहण्यासाठी सिनेमागृहात येणारच. हे चित्र समाधानकारक आहे.
– तरण आदर्श, ट्रेंड अॅनालिस्ट