राज्यात करोना लाट ओसरली आहे. मात्र खबरदारीचा उपाय म्हणून करोना संसर्ग रोखण्याचे सर्व उपाय आजही सुरू आहेत. अशा स्थितीत एसटी कर्मचाऱ्यांना वैद्यकीय भत्ता म्हणून अवघे ३५ रुपये मिळतात. प्रवाशांच्या सातत्याने संपर्कात राहणाऱ्या एसटी चालक-वाहकाला धुलाई भत्त्यापोटी अवघे १०० रुपये मिळत असल्याचे वास्तव आहे.
एम. ए. पूर्ण झालेले गणेश जवादे हे परभणी आगारात वाहक म्हणून ८ वर्षांपासून कार्यरत आहे. वेतन तपशीलानुसार, त्यांचा मूळ पगार १२,३४१ रुपये आहे. १,४८१ महागाई भत्ता आणि ८६४ रुपये घरभाडे मिळते. तसेच धुलाई भत्यापोटी दिवसाचे ३.३० पैसे प्रति दिवस अर्थात महिन्याला १०० रुपये मिळतात. वैद्यकीय भत्ता म्हणून ३५ रुपये मिळतात. करोना काळात मुंबईतील रेल्वे सेवा बंद होती. त्यावेळी बेस्टच्या जोडीला अत्यावश्यक सेवा म्हणून १ हजार गाड्या मुंबईत धावल्या. अशावेळी ३५ रुपये वैद्यकीय भत्ता देऊन कर्मचाऱ्यांची थट्टाच केली आहे. करोनाच्या तिसऱ्या लाटेची धास्ती असताना ३५ रुपयांच्या भत्त्यावर लाखोंची बिले कशी चुकविणार, असा प्रश्न जवादे यांनी उपस्थित केला आहे.
एसटीतील वाहकाला खाकी गणवेश आहे. गाडीत प्रवाशांशी सातत्याने संपर्क होतो. करोनास्थिती लक्षात घेता खबरदारीचा उपायम्हणून रोज गणवेश धुवावा लागतो. त्यामुळे हे भत्ते केवळ नाममात्र असून त्यात कोणताही खर्च भागविणे निव्वळ अशक्य आहे.
एसटी कर्मचाऱ्यांना पदश्रेणीनुसार वैद्यकीय भत्ते असून काही कर्मचाऱ्यांना सध्या ५६ रुपये वैद्यकीय भत्ता देण्यात येतो आणि धुलाई भत्ता हा शंभर रुपये आहे, असा दावा महामंडळाने केला आहे. माजी परिवहन मंत्री दिवाकर रावते यांच्या काळात वैद्यकीय भत्त्यामध्ये वाढ करण्यात आली होती. त्यानुसार वाढीव भत्ते कर्मचाऱ्यांना देण्यात येत आहेत, असे एसटी महामंडळाकडून स्पष्ट करण्यात आले आहे.