बैलांची झुंज लावण्यास बंदी असतानाही भिवंडीतील वेहळेगावात बैलाच्या झुंजीचे आयोजन केल्याचे समोर आले आहे. या प्रकरणी आयोजक, बैलांचे मालक यांच्यासह इतर अशा एकूण २५ पेक्षाही अधिक जणांविरुद्ध नारपोली पोलिस ठाण्यात गुन्हा दाखल करण्यात आला आहे. रविवारी सकाळी वेहळेगावातील गावदेवी क्रीडांगणाच्या बाजूला बैलांच्या झुंजीचे आयोजन करण्यात आले होते. बैलांच्या झुंजीवर बंदी असतानाही मालक त्याठिकाणी बैलांना घेऊन आले आणि झुंजीमध्ये सहभाग घेतला. मालकांवर बैलांना निर्दयतेची वागणूक दिल्याचा तर अन्य आरोपींवर झुंजीस चिथावणी दिल्याचा आरोप आहे. आरोपींनी मनाई आदेशाचा भंग केला असून या प्रकरणी पोलिसांनी दिलेल्या तक्रारीनंतर आयोजकांसह बैलांचे मालक आणि इतर २५ जणांविरुद्ध गुन्हा दाखल करण्यात आला. या प्रकरणाचा नारपोली पोलिसांकडून तपास सुरू आहे.