ठाणे शहराला पाणीपुरवठा करणाऱ्या स्टेम वॉटर डिस्ट्री अॅण्ड इन्फा कंपनीच्यावतीने शुक्रवार-शनिवार देखभाल दुरुस्तीची कामे हाती घेण्यात आली आहेत. त्यामुळे ठाणे शहराला होणारा पाणीपुरवठा शुक्रवार २१ मे सकाळी ९ ते शनिवार २२ मे सकाळी ९ वाजेपर्यंत २४ तास बंद राहणार आहे.
ठाणे महापालिकेच्या स्वतःच्या पाणीपुरवठा योजनेमधून या काळात ठाणे शहराला टप्प्याटप्प्याने पाणी देण्याचे नियोजन करण्यात आले आहे. त्यानुसार शुक्रवारी २१ मे रोजी सकाळी ९ ते संध्याकाळी ९ वाजेपर्यंत शहरातील घोडबंदर रोड, पातलीपाडा, हिरानंदानी इस्टेट, ब्रह्मांड, विजयनगरी, गायमुख, गांधीनगर, सुरकरपाडा, बाळकुम, माजिवाडा, मानपाडा, कोठारी कम्पाउंड, पवारनगर तसेच आझादनगर या भागांचा पाणीपुरवठा बंद राहणार आहे. तर शुक्रवार संध्याकाळी ९ ते शनिवार सकाळी ९ वाजेपर्यंत कळवा, साकेत, ऋतुपार्क, सिद्धेश्वर, जेल टाकी, जॉन्सन, इंटरनिटी, समता नगर व मुंब्राच्या काही भागाचा पाणीपुरवठा बंद राहणार आहे. पाणीपुरवठा पूर्वपदावर येईपर्यत पुढील एक ते दोन दिवस कमी दाबाने पाणीपुरवठा होण्याची शक्यता आहे. त्यामुळे नागरिकांनी पाण्याचा योग्य साठा करून महानगरपालिकेस सहकार्य करावे, असे आवाहन पाणीपुरवठा विभागाच्यावतीने करण्यात आले आहे.