उस्मानाबाद जिल्ह्यात दिवसेंदिवस करोनाबाधितांची संख्या वाढत आहे. दोन दिवसांपूर्वी उस्मानाबाद जिल्हा मध्यवर्ती कारागृहातील ८४ कैद्यांना करोनाची लागण झाल्याचे स्पष्ट झाले. बाहेर न फिरणाऱ्या कैद्यांना करोनाची लागण कशी काय झाली याबाबत आश्चर्य व्यक्त करण्यात येत आहे.
पंधरा मे रोजी प्रशासनाने दिलेल्या अहवालानुसार सेंट्रल जेल उस्मानाबादमधील ८४ जण बाधित असल्याचे स्पष्ट केले. याशिवाय जेलमधील अन्य १४ जण बाधित असल्याचेही अहवालात म्हटले आहे. मध्यवर्ती कारागृहात एवढ्या मोठ्या संख्येने बाधित आढळून आल्याने चिंता व्यक्त होत आहे. या सर्वांची प्रकृती स्थिर असल्याचे आरोग्य विभागाकडून सांगण्यात आले.