वर्षभरापूर्वी निसर्ग वादळाने अलिबागच्या अष्टागरातील किनारी गावांमध्ये होत्याचे नव्हते केले होते. पिढ्या न् पिढ्यांपासून वाढलेली माड-पोफळीची झाडे जमीनदोस्त केली होती… तौक्ते वादळ घोंघावू लागल्यावर पुन्हा तीच भीती किनारी भागातील वाड्यावस्त्यांमध्ये दाटून आली. रविवारी रात्री एकच्या दरम्यान वीजपुरवठा खंडित झाला आणि सोसाट्याचे वारे वाहण्यास सुरुवात झाली. तेव्हापासून सोमवारपर्यंत अलिबागकरांच्या डोळ्याला डोळा लागलेला नाही.
अलिबाग किनारपट्टीवर रविवारी मध्यरात्रीनंतर दोन वाजता वाऱ्याचा वेग भयानक वाढला. वादळी वाऱ्याच्या आवाजाने समुद्रकिनाऱ्यावरील रहिवाशांच्या उरात धडकी भरू लागली. बाहेर मिट्ट काळोख आणि सोसाट्याचे वादळी वारे, पाऊस यामुळे नक्की शेजारी काय परिस्थिती आहे, याचाही अंदाज येत नव्हता. तालुक्यात आणि जिल्ह्यात काय घडते आहे हे कळणेही कठीण बनले. अनेक जण विंडी ॲप पाहत वादळ कधी पुढे सरकते, याचा अंदाज घेत होते. पहाटे साडेपाच वाजता पालघर मुक्कामी वादळ जाणार म्हणून घड्याळाकडे डोळे लावून बसलेल्या रायगडवासीयांची निराशाच झाली आणि भीती अधिक वाढत गेली. सकाळी आठनंतर व्हॉट्सॲप वर फोटो आणि माहिती येऊ लागली तरी तौक्ते वादळ रायगडमधून जाण्याची काही चिन्हे दिसत नव्हती. अखेर साडेबारा वाजता वादळाचा जोर कमी झाला तरी वादळी वारे सुरूच होते. दुपारचे तीन वाजले, तरी सतर्कतेचा इशारा कायम होता. तोपर्यंत अनेक वाड्या आणि रस्त्यांवर पुन्हा एकदा वृक्ष उन्मळून पडले होते. समुद्र खवळलेला होता. घरांवरील तसेच रस्त्यांवर असलेल्या निवाऱ्यांवरचे पत्रे उडाले होते. रायगड जिल्ह्यातला हापूस आंबा रत्नागिरी-सिंधुदुर्गपेक्षा काहीसा उशिरानेच येतो. हा अवीट गोडीचा आंबा आता तयार झाला असतानाच सोसाट्याच्या वाऱ्यामुळे बागांमध्ये फळांचा सडा पडल्याचे डोळ्यादेखत अनेकांना पाहावे लागले. अनेक गावांमध्ये वीज नसल्याने संपर्क तुटला होता. अलिबाग शहरातही विजेचे खांब पडले होते.
रायगडमध्ये सकाळी ९ वाजेपर्यंत एकूण २३.४२ मिमी पावसाची नोंद झाली, तर जिल्ह्यातील ८३९ घरांचे नुकसान झाले होते. जिल्ह्यातील दोन हजार २६३ कुटुंबांतील मिळून एकूण आठ हजार ३८३ व्यक्तींचे सुरक्षित ठिकाणी स्थलांतर करण्यात आले. पेण, मुरुड, पनवेल, कर्जत, खालापूर, माणगाव, रोहा, सुधागड, तळा, पोलादपूर, महाड, म्हसळा, श्रीवर्धन येथील घरांचे नुकसान झाले आहे. पेण-अलिबाग रस्त्यावर ढोलपाडा येथे झाड पडल्याने हा मार्ग बंद करण्यात आला.