पुण्यात गुरुवारी दुपारी बारा वाजून ३१ मिनिटांनी सूर्य डोक्यावर येणार असल्यामुळे माणसांसह सर्व वस्तूंची सावली काही वेळ नाहीशी झाल्याचे दिसून येईल. खगोलीय भाषेत या दिवसाला शून्य सावली दिवस म्हणून ओळखले जाते.
सूर्याच्या उत्तरायण किंवा दक्षिणायनादरम्यान ज्या अक्षांशाच्या आकाशातून त्याचा प्रवास होतो, त्या अक्षांशावरील शहरांमध्ये दुपारी साडेबाराच्या दरम्यान सूर्याची किरणे थेट लंबरूप पडल्यामुळे काही काळ सावली नाहीशी होण्याची घटना अनुभवायला मिळते. सूर्याने २२ मार्च रोजी विषुववृत्त ओलांडून उत्तर गोलार्धाच्या आकाशात प्रवेश केला असून, २१ जून रोजी तो सर्वोच्च बिंदूवर म्हणजेच २३.५ उत्तर अक्षांशांवर (कर्कवृत्त) पोचेल.
या उत्तरायणादरम्यान सहा मे ते २६ मे या कालावधीत सूर्याचा महाराष्ट्राच्या आकाशावरून प्रवास होत आहे. या काळात ज्या शहराच्या अक्षांशावरून सूर्याचा प्रवास होईल, त्या शहरांमध्ये दुपारी साडेबाराच्या दरम्यान काही काळ सावली नाहीशी होण्याची घटना पाहायला मिळेल. पुण्यामध्ये शून्य सावलीची घटना सूर्याच्या उत्तरायणादरम्यान १३ मे रोजी (दुपारी १२:३१), तर दक्षिणायनादरम्यान ३० जुलैला (दुपारी १२:४१) अनुभवायला मिळते. या घटनेविषयीची शास्त्रीय माहिती आणि प्रयोग गुरुवारी दुपारी बारापासून ज्योतिर्विद्या परिसंस्था आणि खगोल विश्व या संस्थांच्या फेसबुक पेजवर लाइव्ह पाहता येतील.