येथील बाळकुम परिसरातील एका इमारतीच्या २०व्या मजल्यावरील एका घरात बेकायदा बाळगलेले एक कासव खाली पडून मृत्यू पावल्याची घटना नुकतीच घडली. याप्रकरणी कासव पाळणाऱ्या व्यक्तीविरोधात कापूरबावडी पोलिस ठाण्यात गुन्हा दाखल करण्यात आला आहे. भारतीय प्राणी बोर्डाचे मानद सदस्य सुनिष कुंजु यांनी याप्रकरणी कापूरबावडी पोलिस ठाण्यात दाखल केलेल्या तक्रारीवरून ही कारवाई करण्यात आली आहे.
१ मे रोजी दुपारी बाळकुम भागातील एक उंच इमारतीच्या २०व्या मजल्यावरून एक कासव खाली पडून मृत्युमुखी पडले. ही घटना प्रत्यक्ष पाहणाऱ्या व्यक्तीने प्राणिमित्रांना छायाचित्रासह या घटनेची माहिती दिली. विशेष म्हणजे, खाली पडलेल्या कासवाला पाहायलाही संबंधित व्यक्ती नंतर खाली आली नाही. वसाहतीतील सफाई कर्मचाऱ्याने त्या मृत कासवाची विल्हेवाट लावली. याप्रकरणी रितसर तक्रार होऊन संबंधित व्यक्तीविरोधात वन्य प्राण्यांना क्रूरतेने वागवल्याबद्दल गुन्हा दाखल करण्यात आला आहे.