रेल्वेस्थानक परिसरात पडून असलेल्या एका महिलेला रेल्वेच्या डॉक्टरांनी मृत घोषित केल्यानंतर ती जिवंत असल्याचे पोलिसांच्या लक्षात आले आणि शवागाराऐवजी तिची रवानगी मेयो हॉस्पिटलमध्ये उपराचारासाठी करण्यात आली. गुरुवारी रात्री ही अजब घटना घडली.
मुख्य रेल्वे स्थानक परिसरात असलेल्या बुलंद इंजिनजवळ एक महिला मृतावस्थेत पडून असल्याची माहिती उपस्टेशन व्यवस्थापकांना मिळाली होती. त्यामुळे त्यांनी रेल्वे हॉस्पिटलच्या डॉक्टरांना याबाबत कळविले. काही वेळाने रेल्वेचे डॉक्टर आले व त्यांनी तपासून त्या महिलेला मृत घोषित केले. तसे प्रमाणपत्रही डॉक्टरांनी स्टेशन कार्यालयाला दिले. त्यामुळे त्या कार्यालयाने लोहमार्ग पोलिसांना पंचनामा करून मृतदेह शवागारात पाठविण्यास सांगितले. लोहमार्गचे सहायक पोलिस निरीक्षक गोविंद मदने व शिपाई महेंद्र मानकर हे पंचनामा करण्यासाठी मृतदेहाजवळ गेले. त्यावेळी तिचा श्वास सुरू असल्याचे त्यांच्या लक्षात आले. त्यामुळे त्यांनी लगेच आपल्या वरिष्ठांना याबाबत माहिती दिली. ज्या महिलेचा मृतदेह मेयोच्या शवगारात पाठविण्याची तयारी पोलिसांनी सुरू केली होती, ती जिवंत असल्याचे कळताच खळबळ उडाली. त्यानंतर तिला मेयोमध्ये दाखल करण्यात आले. सध्या तिची प्रकृती स्थिर आहे. दरम्यान ही महिला नेहमीच रेल्वेस्थानक परिसरात फिरत राहाते. ती दारू पिऊन निपचित पडली असावी, असे प्रत्यक्षदर्शींचे म्हणणे आहे. त्या महिलेने कदाचित दारू प्यायली असेल, पण जिवंत महिलेला मृत घोषित करणाऱ्या रेल्वे डॉक्टरांचे काय, असा प्रश्न या निमित्ताने निर्माण झाला आहे.