करोना संसर्गामुळे उद्भवलेल्या परिस्थितीचे गांभीर्य ओळखून ताज हॉटेलने जवळजवळ दोन महिने पालिका रुग्णालयांतील डॉक्टर, नर्ससह वैद्यकीय कर्मचाऱ्यांसाठी जेवण पुरवले खरे, पण शनिवारी २३ तारखेपासून ही सेवा बंद होणार आहे. यापुढे ही सेवा सशुल्क करण्याबाबत ताज हॉटेलने पालिकेकडे ही विचारणा केली होती. मात्र, त्यासंदर्भात अद्याप निर्णय न झाल्याने डॉक्टरांसह वैद्यकीय कर्मचाऱ्यांना जेवणाचा डबा आणण्याचे निर्देश देण्यात आले आहेत.
ताज हॉटेलकडून पालिका रुग्णालयांमध्ये दुपारी १२ व संध्याकाळी साडे सहा वाजता जेवणाचे डबे यायचे. त्यात वरण भात, सफरचंद, अजून एखादे फळ, दही, केक किंवा अन्य गोड पदार्थ, चिवड्याचे छोटे पाकीट असा आहार असायचा. अनेक डॉक्टरांनी या जेवणामुळे आरोग्यसेवा देताना आधार मिळाला, अशी कृतज्ञता व्यक्त केली होती. हे डबे वेळेवर यायचे आणि ते डॉक्टरांसह रुग्णालयातील इतर वैद्यकीय कर्मचारी, सफाई कामगारांसाठीही असायचे. पण आता ही भोजनसेवा बंद होणार आहे. २३ तारखेपासून घरून डबा आणा, असे विभागप्रमुखांनी सर्व संबधित विभागांना कळवले आहे.
यासंदर्भात पालिकेचे अतिरिक्त आयुक्त सुरेश काकाणी यांच्याकडे विचारणा केली असता, त्यांनी ताज हॉटेलने दोन महिने भोजनसेवा दिल्याबद्दल कृतज्ञता व्यक्त केली. अशा बिकट परिस्थितीमध्ये रुग्णालयातील वैद्यकीय कर्मचाऱ्यांप्रती दाखवलेले औदार्य मोलाचे असल्याचे ते म्हणाले.
कॅन्टीनचा पर्याय
पालिका रुग्णालयांमधील कॅन्टीन सेवा सुरू असली तरीही तिथे सुरक्षित अंतराच्या निकषामुळे एकत्र येण्यास संमती नाही. त्यामुळे पार्सल सेवा देण्यात येते. निवासी डॉक्टर ज्या ठिकाणी राहतात तिथे हॉटप्लेट आहेत, पण जेवण करण्यासाठी वेळ मिळत नसल्याने कॅन्टीनमधील सुविधा घ्यावी लागणार आहे. मात्र, त्यासाठी साठ ते सत्तर रुपये मोजावे लागतील, असे निवासी डॉक्टरांनी सांगितले.
गुरुद्वाराच्या माध्यमातून प्रयत्न
कॅन्टीनचा पर्याय असला तरीही गुरुद्वारा तसेच कम्युनिटी किचन चालवणाऱ्या स्थानिकांना जेवणाचे काम द्यायचे का, यादृष्टीनेही चाचपणी सुरू असल्याचे कळते.