व्यस्त कार्यक्रमांमुळे सेलिब्रिटींना सतत तब्येतीच्या कुरबुरींना सामोरे जावे लागते. याच दगदगीचा फटका कैलाशला बसला आहे. न्यूयॉर्क येथे कार्यक्रमासाठी गेलेल्या कैलाशची तब्येत बिघडली असून तिथून परतताच तो रुग्णालयात दाखल झाला आहे. आरोग्याकडे दुर्लक्ष केल्याने माझी तब्येत बिघडली असे कैलाशने ट्विटरच्या माध्यमातून सांगितले आहे. तब्येतीच्या कारणास्तव त्याने गुजरातमधील भरुचमध्ये होणारा आपला कार्यक्रमही रद्द केला आहे. माझ्या गायकीच्या कारकीर्दीत प्रथमच आपल्यावर अशाप्रकारे कार्यक्रम रद्द करण्याचा प्रसंग ओढवला आहे, असे कैलाशने आपल्या ट्विटमध्ये नमूद केले आहे.
मला मोठा धडा मिळालाय!
तब्येतीकडे दुर्लक्ष करण्याची कुणालाच हौस नसते पण एकदा तुम्ही शब्द दिला की तुम्हाला ते ठिकाण गाठावेच लागते. तिथे कारणे देता येत नाहीत. अशा धकाधकीच्या जीवनामुळेच मी आज कोकिलाबेन रुग्णालयात आहे. ‘न्यूयॉर्कसे आतेही हॉस्पिटल में भरती होना पडा’, असेही ट्विट कैलाशने केलेय. या प्रकाराने मला मोठा धडा मिळाला आहे. भले ओबामांसोबत स्नेहभोजन असूद्या नाही तर नोबेल मिळणार असूद्या आधी आपल्या तब्येतीची काळजी घ्या. ही बाब ‘लाइटली’ घेऊ नका, असे आवाहनही कैलाशने केले आहे.