अमेरिकेत भारतीय स्वातंत्र्यदिनानिमित्त आयोजित करण्यात आलेल्या एका कार्यक्रमात मद्यधुंद व्यक्तीने अभिनेत्री रवीना टंडन हिची छेड काढल्याचा प्रकार घडला असून याबाबत रवीनाने ट्विटरच्या माध्यमातून आपला संताप व्यक्त केला आहे.
भारतीय स्वातंत्र्यदिन अमेरिकेतही मोठ्या उत्साहात साजरा केला जात आहे. लॉस एंजिलिस येथे गेल्या दोन दिवसांपासून कार्यक्रमांचे आयोजन करण्यात आले आहे. अशाच एका कार्यक्रमाला प्रमुख अतिथी म्हणून हजर राहिलेल्या रवीनाला गैरवर्तणुकीला सामोरे जावे लागले आहे. गंभीर बाब म्हणजे ज्या व्यक्तीने रवीनाची छेड काढली ती व्यक्ती आयोजकांपैकीच एक असल्याचे सांगण्यात येते. रवीनानेच हा संपूर्ण प्रकार ट्विटरवर शेअर केला आहे.
रवीनाने आणखी दोन ट्विट करून या व्यक्तीची आपण कशी खरडपट्टी काढली याचा तपशीलही दिला आहे. एखाद्या कार्यक्रमात आपण सगळ्यांनाच हवं तसं वागू शकत नाही. अशावेळी एखाद्या नाराज व्यक्तीने त्याचा बदला घेणं योग्य नाही, अशा शब्दांत रवीनाने आपली नाराजी व्यक्त केली आहे.